Қозоғистон соғлиқни сақлаш вазири Елжан Биртанов Ўзбекистон соғлиқни сақлаш вазири Алишер Шодмонов билан телефонда суҳбатлашиб, қозоғистонликларнинг Хитойдан эвакуацияси учун миннатдорлик билдирди. Бу ҳақда Қозоғистон ССВ матбуот хизмати хабар берди.
Таъкидланишича, томонлар Қозоғистон Соғлиқни сақлаш вазирлигининг тезкор маркази орқали доимий алоқада бўлишга ва ахборот алмашинувни қўллаб-қувватлашга келишиб олди. Хусусан, икки давлат Соғлиқни сақлаш вазирликлари Тошкентда икки ҳафта карантинда бўладиган 5 нафар қозоғистонликнинг ҳолати мониторингини ўтказиб туради.
Эслатиб ўтамиз, Қозоғистон томони илтимосига кўра, 5 февраль куни Хитойнинг Ухань шаҳридан Россия ва Ўзбекистоннинг махсус бортларида 8 нафар Қозоғистон фуқароси эвакуация қилинганди. Уларнинг 5 нафари Тошкентда, қолган уч нафари эса Тюмень шаҳрида икки ҳафта давомида шифокорлар назорати остида бўлади.
Сўнгги маълумотларга кўра, Хитойда коронавирусдан вафот этганлар сони 636 кишига етди. Мамлакатда умумий ҳисобда 31 161 та касалланиш ҳолати қайд этилди.
Хитой коронавируси тарқалгани ҳақидаги хабарлар ортидан Ўзбекистонда тиббий ҳимоя ниқобларига бўлган талаб ошиб бормоқда. Бу эса тиббий ниқоблар дефицитини ва унинг ортидан нархлар ошишини келтириб чиқармоқда. Шу муносабат билан Истеъмолчилар ҳуқуқларини ҳимоя қилиш агентлиги Ўзбекистонда тиббий ниқоблар нархини асоссиз оширган дорихоналар ёпилишини маълум қилганди.
Изоҳ (0)