Хитойда нима гап?
3 февраль ҳолатига кўра, Хитойда 17238 кишида коронавирус аниқланиб, умумий ҳисобда 361 киши вафот этган. Бу атипик пневмония қурбонлари сонидан ҳам кўпроқ. Жаҳон соғлиқни сақлаш ташкилотининг қайд этишича, Хитойда 2002—2003 йилларда тарқалган атипик пневмония 349 кишини ҳаётига нуқта қўйган.Коронавирусдан ҳозирга қадар 480 га яқин киши соғайгани айтилмоқда. Бошқа мамлакатларда коронавирусни юқтирганлар сони 150 кишидан ортиқни ташкил қилмоқда.
Гонконг университети олимлари эса Ухандаги коронавирусни аслида неча киши юқтириб олганига ойдинлик киритди. Олимларга кўра, 2020 йилнинг 25 январь ҳолатида коронавирусни юқтирган беморлар сони 75 815 нафарни ташкил этган. Бу эса расмий равишда эълон қилинган рақамлардан ўн баравар кўп дегани.
Кеча, 2 февраль куни хитойлик шифокорлар коронавирус инфекцияси билан хасталанган 33 ёшли аёл ўпкасининг суратини эълон қилди. Биринчи суратда ўпкадаги хиралашишлар кўрсатилган бўлса, уч кун ўтиб олинган иккинчи суратда зарарланган соҳа кенгайганини кўриш мумкин.
Бугун, 3 февраль куни Хитой ҳукумати коронавируснинг тарқалишидан зарар кўрган мамлакат иқтисодиётини қўллаб-қувватламоқчи эканлигини маълум қилди. Бунинг учун Хитой Марказий банки бозорга 1,3 триллион юан (173 миллиард доллардан ортиқ) миқдоридаги ликвидликни чиқарди.
Шунингдек, Янги йил таътилидан сўнг Хитойда бошланган биринчи биржа савдолари коронавирус тарқалиши шароитида 8 фоизлик қулаш билан иш бошлади. Бундан ташқари, 2019-nCoV коронавируснинг тарқалиши Хитойда нефтга бўлган талабнинг кескин пасайишига ҳам олиб келди.
Ухань шаҳрида 2020 йил 1 февралдан бошлаб коронавирусдан вафот этган беморларни дафн этиш тақиқланди. Business Insider’нинг ёзишича, бу ҳақда Хитой соғлиқни сақлаш миллий комиссияси коронавирусдан вафот этганлар сони 304 кишига етганини эълон қилган вақтдан бошлаб маълум қилган.
Жаҳонда-чи?
Бир муддат аввал, Хитой коронавирус эпидемияси сабаб 60 миллиард доллар йўқотиши мумкинлиги тахмин қилинганди, шу сабаб расмий Пекин иқтисодиётда «дарча» пайдо бўлиб қолмаслиги учун инфекция тарқалишини бор кучи билан тўхтатишга уринмоқда. Moody’s Analitics компанияси эса коронавирус жаҳон бозорига 2008—2009 йиллардаги молиявий инқироздан ҳам кучлироқ таъсир кўрсатиши мумкинлиги ҳақида огоҳлантирди.
Россия 3 февралдан бошлаб Хитой билан темир йўл орқали йўловчилар қатновини номаълум муддатга тўхтатди. Шунингдек, мамлакат ҳукумати янги 2019-nCoV коронавирусини атрофдагилар учун хавф туғдирувчи касалликлар қаторига киритди.
Ростов-Дондаги хитойлик талабадан коронавирус аниқланмагани маълум бўлди. Аввалроқ мессенжерларда хитойлик талаба тез ёрдам машинасида олиб кетилгани ва шифокорлар унга коронавирус ташхисини қўйгани ҳақида миш-мишлар тарқалганди.
Қирғизистон Хитойнинг Ухань шаҳридан ўзининг 18 нафар фуқаросини эвакуация қилди. Хабарда айтилишича, эвакуация қилинганларнинг барчаси аэропортнинг ўзида текширувдан ўтказилиб, карантин учун Бишкекдан ташқарида жойлашган махсус инфекцион бўлинмага жойлаштирилган.
АҚШ эса охирги икки ҳафта мобайнида Хитойга борган чет элликларни мамлакатга киришини тақиқлаб қўйди.
Германия соғлиқни сақлаш вазири Йенс Шпан G7 давлатлари Хитойда янги коронавирус авж олиши билан боғлиқ вазиятни муҳокама қилди.
Ўзбекистонда-чи?
Бугун, 3 февраль куни Россия Ўзбекистонга янги коронавируснинг лаборатория диагностикаси воситаларини топширди. Кимёвий таҳлил учун асбоб-ускуналардан иборат тест тизимлари ўзбекистонлик ва қозоғистонлик мутахассисларга 1, 2 февраль кунлари етказиб берилган.
Андижон вилояти соғлиқни сақлаш бошқармаси Хитойдан келган талабалар соғлиғи ҳақида маълумот бериб, ижтимоий тармоқларда «Хитой вируси муносабати билан хавфсизлик чоралари кўрилганмикан?», «Андижонга Хитойдан касаллик олиб келганлар йўқмикан?» мазмунида пайдо бўлган кўплаб саволларга жавоб беришга уриниб кўрди.
Санитар-эпидемиологик осойишталик агентлиги Хитойдан келган Ўзбекистон фуқаролари 14 кун муддатга тиббий назоратга олинаётганини маълум қилиб, шу вақтгача Давлат чегара постларидаги санитария-карантин пунктлар орқали ўтказилган фуқароларда тана ҳарорати кўтарилганлари аниқланмаганини таъкидлаган.
Бироқ, Хитойдан Тюменга келган ҳамда коронавирус аниқланган хитойлик талаба қиз билан бир самолётда учган уч нафар Ўзбекистон фуқароси Ханти-Мантийск автоном округидаги касалхонага ётқизилган. «Уларда коронавирус хавфи йўқ. Улар коронавирус юқтирган бемор билан гаплашган. Ўзбекистонликлар бошқалардан изоляция қилинган. Таҳлил натижалари кутилмоқда. Уларнинг аҳволи яхши», — деди «Роспотребнадзор» ҳудудий бўлими бошлиғи ўринбосари Инна Кудрявцева.
Жаҳон соғлиқни сақлаш ташкилотининг Ўзбекистондаги ваколатхонаси билан ҳамкорликда коронавирус инфекциясининг мамлакатга кириб келиши ва тарқалишининг олдини олиш борасида видеоселектор йиғилиши ўтказиб, Ўзбекистонда коронавирус инфекциясига чалинган беморлар қайд этилмаганини, Республикада ушбу касалликка ташхис қўйиш имконияти мавжудлигини, шунингдек, даволай оладиган малакали мутахассислар ҳам етарлиги ҳақида тўхталиб ўтди.
Изоҳ (0)