Хитойнинг Ухань шаҳрида 2020 йил 1 февралдан бошлаб коронавирусдан вафот этган беморларни дафн этиш ва у билан боғлиқ бошқа шу каби маросимларни ўтказиш тақиқланди, деб хабар бермоқда Global Times нашри.
Business Insider’нинг ёзишича, бу ҳақда Хитой соғлиқни сақлаш миллий комиссияси коронавирусдан вафот этганлар сони 304 кишига етганини эълон қилган вақтдан бошлаб маълум қилинган. Аввалроқ одамларга вируснинг янада кенг тарқалишининг олдини олиш мақсадида тумонат одам тўпланишини чеклаш ва дафн маросимларини оддий ва тез ўтказиш тафсия этилган.
Янги тартибга кўра, вафот этган беморлар энг яқин жойлашган крематорийга олиб борилиб, ёқиб юборилади. «Марҳумни дафн этиш ва у билан видолашув билан боғлиқ ҳеч қандай маросим ўтказилмайди», — дейилади Хитой соғлиқни сақлаш миллий комиссияси баёнотида.
Бугун 3 февраль ҳолатига кўра, короновирусдан вафот этганлар сони 362 кишига етди, 17 минг киши касалланди. Бутун дунёда касалланганларни ҳисобга олганда бу кўрсаткич 14 562 кишини ташкил этмоқда.
Хитой ташқарисида касаллик оқибатида вафот этиши билан боғлиқ илк ҳолат қайд этилди: Филиппинда Уханьдан келган эркак 1 февраль куни ҳаётдан кўз юмган. Маълумот учун, шу вақтга қадар коронавирус билан касалланиш ҳолатлари Хитойдан ташқари АҚШ, Германия, Буюк Британия, Япония, БАА ва Россияда қайд этилди.
Мамлакатнинг коронавирус ўчоғи бўлган Хубэй провинцияси билан чегарадош Хунан провинциясида парранда гриппи тарқалди: парранда гриппи Шаоян шаҳрининг Шуансин туманида жойлашган фермада қайд этилган. Фермада жами 7 850 та товуқ бўлган, улардан 4500 таси гриппга чалиниб, нобуд бўлган.
Изоҳ (0)