Гонконг университети олимлари Ухандаги коронавирусни аслида неча киши юқтириб олганига ойдинлик киритди. Бу ҳақда Science Alert нашри хабар берди.
Университет олимларининг баҳолашларига кўра, 2020 йилнинг 25 январь ҳолатида коронавирусни юқтирган беморлар сони 75 815 нафарни ташкил этган. Бу эса расмий равишда эълон қилинган рақамлардан ўн баравар кўп, — дейилади хабарда.
Вирус тарқалишининг ҳақиқий манзараси назарий моделлаштириш асосида олинган.
Тасдиқланган ҳолатларнинг расмий сонга мос келмаслиги бир неча омилларга боғлиқ, жумладан, инфекцияни юқтириб олиш ҳамда биринчи аломатлар пайдо бўлиши ўртасидаги муддат, лаборатория таҳлиллари орқали инсон организмида 2019-nCoV мавжудлигини тасдиқлаш учун зарур бўлган вақт.
Тадқиқот натижаларига кўра, декабрь ойида вирус билан касалланган ҳар бир киши 2—3 кишига касалликни юқтирган бўлиши мумкин. Беморларнинг сони ҳар 4—6 кунда икки баравар кўпайган.
Олимларнинг фикрига кўра, эпидемиянинг иккинчи даражали ўчоқлари Ухандан икки ҳафта кечикиш билан Хитойнинг барча йирик шаҳарларида юзага келган бўлиши мумкин.
Агар баҳолашлар ўз тасдиғини топса, коронавирусдан ўлим даражаси тахмин қилинганидан сезиларли даражада паст ҳамда бир фоиздан камроқни ташкил этади.
Ўлим даражасининг камлиги агар касаллк кенг тарқалса, коронавирусдан вафот этиш ҳолатлари ортишига олиб келиши мумкин. Ҳар йили мавсумий гриппдан 290 000 дан 650 000 нафаргача одам вафот этади.
Аввалроқ Россия коронавирусни атрофдагилар учун хавф туғдирувчи касалликлар рўйхатига киритгани ҳақида хабар берилган эди. Ҳозирда Хитойда коронавирус туфайли вафот этганлар сони 361 нафарга етди.
Маълумот учун, Хитойдан келган Ўзбекистон фуқаролари 14 кун муддатга тиббий назоратга олиниши маълум қилинди.
Изоҳ (0)