Хитойда 2019-nCoV коронавирусидан 2002—2003 йиллардаги атипик пневмониядан ҳам кўра кўпроқ одам вафот этди, деб хабар берди Meduza.
3 февраль тонгидаги маълумотларга кўра, Хитойдаги коронавирус қурбонлари сони 361 нафарга етди. Филиппинда ҳам бир киши ушбу вирусдан вафот этган.
Жаҳон соғлиқни сақлаш ташкилотининг қайд этишича, Хитойда 2002 йилнинг 1 ноябридан 2003 йилнинг 31 июлигача атипик пневмония тарқалиб, унинг оқибатида 349 киши вафот этганди.
3 февраль ҳолатига кўра, Хитойда 17238 кишида коронавирус аниқланган. Бошқа мамлакатларда эса вирусни юқтирганлар сони 150 дан ортиқ. 480 нафарга яқин киши соғайган.
Маълумот учун, Хитойдан келган Ўзбекистон фуқаролари 14 кун муддатга тиббий назоратга олинмоқда.
Эслатиб ўтамиз, Соғлиқни сақлаш вазирлиги Ўзбекистонда коронавирус тарқалгани ҳақидаги хабарлар ҳақиқатга тўғри келмаслигини, бугунги кунга қадар Ўзбекистон фуқаролари орасида инфекция қайд этилмаганини маълум қилган эди.
Ташқи ишлар вазирлиги Хитойдаги ўзбекистонликларни эвакуация қилиш учун Пекиндан Тошкентга чартер рейслар 4 ва 5 февраль кунлари Пекин аэропортнинг 2-терминалидан амалга оширилишини маълум қилиб, Ўзбекистон фуқароларидан 3 февраль, душанба куни, Пекин шаҳридага элчихонага келишларини сўраган.
Шунингдек, вазирлик авиақатновлар бекор қилингани туфайли Пекин аэропортида қолиб кетган 3 нафар ўзбекистонлик талабага ёрдам кўрсатилишини маълум қилиб, талабалар билан алоқа ўрнатиб, муаммони ҳал қилиш бўйича дипломатлар тегишли чораларни кўраётганини эълон қилди.
Изоҳ (0)