Ўзбекистон Сенати Қашқадарё вилоятининг Чироқчи тумани ИИБда сўроққа олиб келинган фуқаронинг калтакланиб, ўлдирилгани юзасидан муносабат билдирди. Унинг тўлиқ матни билан қуйида танишиш мумкин.
Шу кунларда интернет нашрларида Қашқадарё вилояти Чироқчи туманида содир бўлган воқеа бўйича «Участкавойларингни қутқариб қолсаларинг, ургани йўқ десаларинг, рози қилади» сарлавҳаси остида эълон қилинган хабар ижтимоий тармоқларда ҳамда жамоатчилик орасида кенг муҳокама қилинмоқда.Ушбу хабарда Қашқадарё вилояти Чироқчи туманида ўғирликда гумонланган 32 ёшли фуқаро Ю.А.ни калтаклаб ўлдирган ИИБ ходимлари ўз қилмишларини яширишга уринишганлиги, шунингдек, марҳум Ю.А. билан бирга ота-бола — Қурбон Остоноев ва Баҳром Авлиёқулов ҳам аёвсиз калтакланганлиги келтирилган.
Мазкур ҳолат юзасидан Қашқадарё вилоят прокуратураси томонидан туман ИИБ ходимларига нисбатан жиноят иши қўзғатилиб, тергов ҳаракатлари Ўзбекистон бош прокурори томонидан назоратга олинди.
Ички ишлар вазирлигига ички ишлар органлари ходимларининг хизмат визифалари қонун асосида бажарилишини ташкил қилиш, ҳуқуқбузарликларга йўл қўймаслик чора-тадбирларини кучайтириш топширилди.
Ўзбекистон Сенатининг Мудофаа ва хавфсизлик масалалари қўмитаси мамлакатимизда ҳар қандай кўринишдаги жиноятларга нисбатан муроса қилиб бўлмаслигини таъкидлайди.
Изоҳ (0)