АҚШнинг Google корпорацияси коронавирус хавфи сабабли Хитойдаги, шу жумладан, Гонконг ва Тайвандаги барча офисларини вақтинча ёпишини эълон қилди. Бу ҳақда The Verge нашрига таяниб, «Коммерсантъ» хабар берди.
Айни пайтда Google’нинг Хитойда жойлашган офислари узайтирилган Янги йил таътиллари сабабли ишламаяпти. Хитой ҳукумати аҳолини уйда қолиш ва саёҳат қилишдан тийилишга чорлаган ҳолда вирус тарқалишини камайтиришга ҳаракат қилмоқда. Google вакилининг сўзларига кўра, компания ҳукумат кўрсатмаларига мувофиқ ўз идораларини ёпиқ ҳолда сақлашни давом эттиришни режалаштирмоқда ва Хитойга хизмат сафарларини амалга оширишга вақтинча чекловлар ҳам киритди.
Компания хитойлик ходимларига ва қариндошлари яқинда Хитойда бўлиб қайтган ишчиларига уйга қайтишни ва уйга келганидан кейин камида 14 кун уйидан ишлашни тавсия этмоқда.
Google хизматларининг аксарияти Хитойда ишламаслигига қарамай, компаниянинг мамлакатда тўртта ваколатхонаси мавжуд. Шунингдек, Google Хитойда Pixel смартфонлари ва Google Home ақлли колонкаларини сотиш билан шуғулланади.
Apple ва Facebook ҳам мазкур ҳафта ўз ходимларининг ишга чиқишини чеклади. Шунингдек, Apple Хитойда битта дўконини ёпганлигини ва ишчилар ҳароратини доимий равишда ўлчаб турганини маълум қилди. Apple’нинг Осиёдаги етказиб берувчилари компаниянинг iPhone ишлаб чиқаришни кўпайтириш режаси коронавируснинг тарқалиши сабабли бузилиши мумкин, чунки кўплаб iPhone йиғиш заводлари Хубэй провинциясига туташ бўлган Хэнань ва Гуандун провинцияларидаги шаҳарларида жойлашган. Samsung компанияси ҳам Хитойда заводларнинг ёпилишини маълум қилди.
Изоҳ (0)