Facebook’нинг 2019 йилдаги даромади 27 фоизга ўсиб, 70,7 миллиард долларни ташкил этди, дея хабар беради The Wall Street Journal компаниянинг чораклик ҳисоботига таяниб. Бу ундан аввалги йилга нисбатан 15 миллиард долларга кўпдир.
Meduza’нинг ёзишича, соф даромад 7 фоизга ўсиб, 7,3 миллиард долларга етди. Шу билан бирга, компаниянинг тўртинчи чоракдаги харажатлари 2018 йилнинг тўртинчи чорагига нисбатан 34 фоизга ошиб, 12 миллиард долларга етди.
Ўтган йил давомида Facebook акциялари 55 фоизга ўсди ва ҳозирда битта қимматли қоғоз нархи 220 доллардан қимматдир.
Ижтимоий тармоқнинг кунлик аудиторияси 1,66 миллиард фойдаланувчи, ойлик аудиторияси эса 2,5 миллиард фойдаланувчини ташкил этади. Ҳар ойда компаниянинг барча дастурлари, жумладан, Instagram, Messenger ва WhatsApp’дан 2,89 миллиард киши фойдаланади.
Forbes маълумотларига кўра, чораклик ҳисобот эълон қилингандан сўнг, Facebook акциялари қарийб 7 фоизга тушиб кетди. Шу шароитда ижтимоий тармоқ асосчиси Марк Цукербергнинг бойлиги 5 миллиард долларга қисқариб, 77 миллиард долларга тушиб кетди.
Изоҳ (0)