Ҳиндистон пойтахти Нью-Деҳлида ўтказилаётган фуқаролик тўғрисидаги қонунга қарши норозилик намойишида номаълум шахс намойишчиларга қарата ўқ узди. Times of India’нинг ёзишича, ҳодиса оқибатида бир талаба яраланган ва шифохонага ётқизилган, ўқ узган шахс эса Ислом университети талабалари кўмагида қўлга олинган.
Ҳиндистон парламенти томонидан фуқаролик тўғрисидаги қонунга киритилган тузатишларга мувофиқ, Афғонистон, Покистон ва Бангладеш каби қўшни мамлакатлардан қочиб келган мусулмон бўлмаган шахслар, агар улар ўз ватанларида таҳқирлашларга учраётган бўлса, Ҳиндистон фуқаролигини соддалаштирилган тартибда олиши мумкин.
Police watch as a guy waves a gun outside Jamia University. Man says "Yeh lo azaadi." This week a minister chanted - desh ke gaddaron ko, goli Maro saalon ko. pic.twitter.com/19mfHvFcQR
— Niha Masih (@NihaMasih) January 30, 2020
Ушбу қонун ҳиндистонлик мусулмонларнинг норозилигига сабаб бўлди — уларнинг фикрича, сўнгги тузатишлар конституцияга зид, чунки расман дунёвий ҳисобланган мамлакатда аҳолининг бир қисми диний эътиқодидан келиб чиқиб камситилмоқда. Ҳиндистон шимоли-шарқий штатлари аҳолиси ҳам қонунга эътироз билдирган — энди улар Бангладешдан келган миллионлаб одамлар уларнинг штатларида доимий қолиб кетишидан хавотирда. Бу ҳолат норозилик намойиши иштирокчиларининг фикрича, маҳаллий аҳоли манфаатларига зид.
Мухолифат вакилларининг фикрича, тузатишлар киритилган қонун камситувчи мазмунга эга, чунки — мамлакат аҳолиси (1,3 миллиард киши)нинг 10 фоиздан кўпроғи ислом динига эътиқод қилаётган бир вақтда — мусулмонларнинг фуқаролик олиш имкониятларини чеклайди. Танқидчиларнинг таъкидлашича, бундай шароитда диний эътиқод фуқаролик олиш учун шартга айланмаслиги лозим.
Ҳиндистон Олий суди 22 январь куни фуқаролик тўғрисидаги қонуннинг амал қилишини тўхтатиб туришни рад этган ва ушбу қонун бўйича петицияга жавоб қайтариш учун ҳукуматга тўрт ҳафта муҳлат берган эди.
Изоҳ (0)