Японияда Хитойнинг Ухань шаҳридан бўлган сайёҳларни ташиётган автобус ҳайдовчиси коронавируснинг янги тури билан касаллангани аниқланди. Meduza’нинг Kyodo News’га таяниб ёзишича, бу мамлакатда вирус билан зарарланишнинг Хитойга бориш билан боғлиқ бўлмаган биринчи ҳолатдир.
Япония Соғлиқни сақлаш вазири Кацунобу Катонинг айтишича, ҳайдовчи январь ойи бошида янги вирус тарқалган Ухань шаҳридан бўлган хитойлик сайёҳлар гуруҳини ташиган.
Қайд этилишича, Японияда умумий ҳисобда 6 киши коронавирус юқтириб олгани аниқланган бўлиб, уларнинг 5 нафари Хитойга бориб келганидан сўнг касалланган.
Германияда ҳам коронавирус билан касалланишнинг илк ҳолати тасдиқланди. Бавариянинг Штарнберг округида яшовчи 33 ёшли киши ўтган ҳафтада Хитойдан келиб кетган ҳамкасби билан гаплашганидан сўнг вирус юқтириб олган.
Сўнгги маълумотларга кўра, Хитойда янги турдаги коронавирус сабабли юзага келган пневмониядан 106 киши вафот этди, 4500 дан ортиқ киши касалланди.
Жаҳон соғлиқни сақлаш ташкилоти 23 январь, пайшанба куни ушбу вирус одамдан одамга ўтишини маълум қилган, фақат бу қанчалик тез амалга ошиши ҳозирча номаълум. Ташкилот, шунингдек, коронавируснинг глобал хавфини баҳолаш билан боғлиқ ҳужжатларда хатога йўл қўйилганини ва у қайд этилганидек ўртача эмас, юқори эканини тан олган.
Изоҳ (0)