Yaponiya koronavirus o‘chog‘i hisoblangan Xitoyning Uxan shahrida 200 ga yaqin fuqarosini qaytarib olib kelish uchun charter reys yuboradi. Bu haqda mamlakat tashqi ishlar vaziri Tosimitsu Motegiga tayanib, “TASS” xabar berdi.

Foto: Xinyanyu

“Men Uxandagi yaponiyaliklarni mamlakatga qaytarish bo‘yicha Xitoy TIV rahbari Van I bilan telefon orqali suhbatlashdim. Yaponiyadan Uxanga birinchi charter reys bugun kechasi uchadi. Ertaga ertalab u ortga qaytadi va kunning birinchi yarmida Tokiodagi Xaneda aerportiga yetib keladi. Biz 200 ga yaqin odamni evakuatsiya qilishni mo‘ljallanganmiz”, — deydi Motegi.

Samolyot ortga qaytayotganida shifokorlar va sanitar-epidemiologiya nazorati mutaxassislari yo‘lovchilarni to‘liq tibbiy ko‘rikdan o‘tkazadi. Agarda kasallik alomatlari aniqlansa, ular Tokiodagi maxsus shifoxonaga joylashtiriladi. Shifokorlar tomonidan ahvoli yaxshi deya topilgan fuqarolar o‘zlarini yomon his qilishlari bilan shifokorga murojaat qilishlari lozimligi bo‘yicha hujjatga imzo chekadi.

Vazirning so‘zlariga ko‘ra, Uxandan o‘z xohishi bilan ketish istagini jami 650 nafar yapon fuqarosi bildirgan. Yaponiya Xitoy tomoni bilan kelishgan holda evakuatsiya qilishni davom ettiradi. Shuningdek, Yaponiyadan Xitoyga tibbiy niqoblar va himoya kiyimlari yetkazib beriladi.

Uxandagi yaponiyaliklar orasida ko‘plab kompaniyalarning vakolatxonalarida ishlovchi xodimlar mavjud. Xususan, shaharni tark etishi kerak bo‘lganlar orasida Honda avtomobil konsernining 30 nafar xodimi ham bor.

O‘zbekistonda hozircha koronavirus bilan kasallanish holatlari rasman qayd etilgani yo‘q. Mamlakat aeroportlarida kasallikka qarshi xavfsizlik choralari ko‘rilgan, xususan, kuni kecha Xitoydan qaytarib olib kelingan o‘zbekistonlik talabalar aeroportning o‘zidayoq jiddiy tekshiruvdan o‘tkazilgani haqida xabar berilgan edi.