Ўзбекистонда 2020 йилнинг дастлабки 10 куни ичида юз берган 107 та ЙТҲда 35 киши ҳалок бўлди

Ўзбекистон Ички ишлар вазирлиги Йўл ҳаракати хавфсизлиги бош бошқармаси мамлакатда юз бераётган йўл-транспорт ҳодисалари ҳақида батафсил маълумот беришни бошлади. Дастлабки маълумотлар бош бошқарма матбуот хизмати томонидан эълон қилинди.

Берилган маълумотга кўра, 2020 йилнинг дастлабки 10 куни ичида мамлакатда 107 та ЙТҲ юз берган, уларнинг 103 таси ҳайдовчиларнинг айби билан, 4 таси эса пиёдаларнинг айби билан юзага келган. Мазкур ЙТҲларда жабрланганлар 100 кишини, қурбон бўлганлар эса 35 кишини ташкил қилган.

Энг кўп ЙТҲ Тошкент вилоятида қайд этилган бўлиб, уларнинг сони 20 тани ташкил қилган. Ундан кейинги қатордан Жиззах, Наманган ва Фарғона вилоятларининг ҳар бири 11 тадан ЙТҲ билан жой олган. Тошкент шаҳрида мазкур муддат ичида 10 та ЙТҲ юз берган. Сурхондарёда 9 та, Андижонда 7 та, Бухоро ва Қашқадарё вилоятларида 6 тадан, Навоий ва Самарқандда 3 тадан ЙТҲ юз берган бўлса, Сирдарё ва Хоразмда 2 тадан ЙТҲ қайд этилган.Юз берган 107 та ЙТҲнинг дастлабки таҳлиллари натижаларига кўра, 35 та йўл-транспорт ҳодисаси пиёдалар йўлнинг қатнов қисмини белгиланмаган жойдан кесиб ўтаётган вақтда юз берган. Тезликни ошириш оқибатида 18 та ЙТҲ юз берган бўлса, қувиб ўтиш қоидаларининг бузилиши ва ҳаракатнинг тескари йўналишига чиқиш оқибатида 14 та шундай ҳолат юзага келган. Шунингдек, ҳаракат йўналишини ўзгартириш оқибатида 7 та, чорраҳани кесиб ўтиш қоидаларини бузиш ва светофорнинг тақиқловчи белгисини менсимаслик оқибатида 6 та, ҳайдовчилар томонидан пиёдалар ўтиш жойларида йўл ҳаракати қоидаларини менсимаслик оқибатида 4 та, масофани сақламаслик сабабли 1 та ва бошқа сабаблар оқибатида 22 та ЙТҲ юз берган.«Gazeta.uz»нинг хабар беришича, Йўл ҳаракати хавфсизлиги бош бошқармаси бундан буён ЙТҲлар ҳақида батафсил маълумотларни эълон қилиб боради.

Йўл ҳаракати хавфсизлиги бош бошқармаси маълумотларига кўра, 2019 йилда 8588 та ЙТҲ қайд этилган бўлиб, уларнинг оқибатида 1915 киши қурбон бўлган ва 6673 киши турли тан жароҳатлари олган. Ўтган йилда ҳайдовчилар айби билан 7643 та ЙТҲ юз берган бўлса, 845 та ЙТҲ пиёдалар айби билан содир бўлган.