Навоий шаҳри марказидаги 4 қаватли бозорда 16 январь куни кечқурун ёнғин келиб чиққани ҳақида хабар берилган эди.
Ўзбекистон Ички ишлар вазирлиги ҳузуридаги Тергов департаменти томонидан маълум қилинишича, 2020 йил 16 январь куни соат тахминан 21:15 да Навоий шаҳридаги 4 қаватдан иборат бўлган Навоий савдо комплексининг 4-қаватида ёнғин келиб чиққан. Натижада 150 квадрат метр майдонни эгаллаган 6 та кийим-кечак савдо дўкони ёниб яроқсиз ҳолга келган, 14 та савдо дўкони эса зарарланган. Тан жароҳати олган фуқаролар ва қурбонлар йўқ. Ҳодиса жойида тергов-тезкор гуруҳи ишламоқда. Ёнғиннинг келиб чиқиш сабаблари ўрганилмоқда.
Навоий вилояти Фавқулодда вазиятлар бошқармаси томонидан «Дарё»га маълум қилинишича, ёнғин 16 январь куни соат 21:19 да Навоий шаҳар М.Таробий кўчасида жойлашган «Навоий Савдо комплекси» акциядорлик жамиятига қарашли 3 қаватли савдо мажмуасининг 3-қаватидаги савдо дўконларида содир бўлган.
Вилоят ФВБ навбатчилик қисмига келиб тушган маълумотга асосан соат 21:23 да воқеа жойига 7 та ёнғин ўчириш ва 1 та қутқарув автомашинаси етиб борган. Амалга оширилган тезкор тадбирлар натижасида соат 21:45 да ёнғин тўлиқ бартараф этилган ҳамда мажмуанинг 208 та савдо дўкони жойлашган 6958 квадрат метр қисми ёнғиндан сақлаб қолинган.
Бошқарма маълумотига кўра, ёнғин натижасида 6 та савдо дўконининг жами 82 квадрат метр қисми ёниб зарарланган. Ҳодиса оқибатида ҳалок бўлганлар ва тан жароҳати олганлар йўқ. Дастлабки тахминларга кўра, ёнғин қисқа туташув натижасида келиб чиққан.
«Kun.uz»нинг хабар беришича, савдо маркази ичидан ҳеч нарсани олиб чиқишнинг имкони бўлмаган. Аҳоли вакиллари бу бино ўрнида олдин ҳам савдо мажмуаси бўлгани ва у ҳам ўз вақтида ёниб кетганини маълум қилган.
Изоҳ (0)