Toshkentning Shayxontohur tumanida inson o‘limi bilan yakunlangan YTH yuz berdi, deb xabar berdi Toshkent shahar IIBB matbuot xizmati.

Foto: Toshkent shahar IIBB matbuot xizmati

15-yanvar kuni soat 01:55 da Lutfiy va Nurafshon ko‘chalari kesishmasida 28 yoshli Toshkent viloyatida istiqomat qiluvchi Murodjon A. VAZ-2107 rusumli avtomobilni (davlat raqami 10 H 019 MA) tegishli ruxsatnomasiz mast holatda boshqarib, boshqaruvni bajara olmasdan yo‘l chetiga chiqib ketgan va yo‘l chetida savdo qilib turgan 56 yoshli Dilfuza V.ni urib yuborgan. Jabrlanuvchi shifoxonaga yetkazildi, ammo unga ko‘rsatilgan tibbiy yordamga qaramasdan, olingan jarohatlar sababli hayotdan ko‘z yumdi. Marhumaning yaqinlariga chuqur ta’ziya izhor etamiz.

Hozirda ushbu fakt bo‘yicha Shayxontohur tumani IIO FMB tomonidan tergov oldi tekshiruvi olib borilmoqda.

Avvalroq Toshkentdagi “Farhod” dehqon bozori yaqinida yirik YTH yuz bergani haqida xabar berilgan edi.