ИИВ Тергов департаменти масъул ходими Адҳамжон Абдуллаев «Авто олтмиш ой» МЧЖ мансабдор шахсларига нисбатан қўзғатилган жиноят иши билан боғлиқ қўшимча тафсилотларни маълум қилди, деб хабар беради «Kun.uz».
Тергов жараёнида аниқланишича, Жамшид Баҳодиров ўзининг жиноий шериклари билан олдиндан тил бириктириб, бир гуруҳ бўлиб, ‘Авто олтмиш ой’ ва Catalea Media МЧЖ ва ЯТТ ‘Ж.Баходировъни ташкил этиб, 3 ой муддат ичида Ўзбекистонда UzAuto Motors АЖ томонидан ишлаб чиқарилган автомашиналарни етказиб беришни ваъда қилиб, жами 18 мингдан ортиқ фуқаролардан автомашина русумига қараб, 1 миллион сўмдан 10 миллион сўмгача бўлган миқдорда пул олиб, жами 57 миллиард сўм маблағни қўлга киритган.2019 йил 21 октябрь куни Ж.Баҳодировга нисбатан Жиноят кодексининг 188-1-моддаси 3-қисми «а» банди билан айблов эълон қилиниб, «қамоққа олиш» эҳтиёт чораси қўлланган.
Бундан ташқари, 2019 йил 11 ноябрь куни ушбу жиноятга алоқдор яна 3 нафар шахсга нисбатан Жиноят кодексининг 188-1-моддаси 3-қисми «а» банди билан айб эълон қилинган ва уларга ҳам тегишли эҳтиёт чоралари танланган.
Жиноят иши юзасидан ўтказилган тинтув-тергов ҳаракати давомида олинган компьютер техника воситалари, 3 та Spark, 1 та Trecker, 1 та Damas, 1 та Lacetti русумли, жамият ходимларига тегишли автомашиналар, 28 та турли русумдаги умумий қиймати 2,1 миллиард сўм бўлган автомашиналар хатланган.
Адҳам Абдуллаев, Тергов департаменти масъул ходими
Унинг сўзларига кўра, ҳозирги кунга келиб жиноят иши юзасидан жами 16 минг 800 нафар киши сўроқ қилинган.
Маълум қилинишича, етказилган моддий зарар ҳажми 57 миллиард сўмга тенг. Шундан 44 миллиард сўми ундирилган (26,1 миллиард сўми нақд пул шаклида). Жами 17,9 миллиард сўмлик мол-мулк хатланган.
«Ҳозирда дастлабки тергов ҳаракатлари давом эттирилмоқда ва жиноят иши якунига кўра ОАВ вакиллари билан учрашув (брифинг) ташкил этилади», – дея қўшимча қилди Тергов департаменти расмий вакили.
Эслатиб ўтамиз, 2019 йилнинг октябрида «Авто олтмиш ой» МЧЖ мансабдор шахслари ва бошқаларга нисбатан Жиноят кодексининг 188-1-моддаси 1-қисми (пул маблағларини ва бошқа мол-мулкни жалб этишга доир ноқонуний фаолият) билан жиноят иши қўзғатилган эди.
Изоҳ (0)