«Ўзбекипаксаноат» уюшмаси томонидан 2019 йилда 2 248,5 гектар ер майдонида янги тутзорлар ташкил этилиб, тут плантациялари қошида 652 тадан зиёд қуртхоналар қурилди. Шунингдек, 11 та пиллани қайта ишлаш корхонаси модернизация қилинди, 15 та янги пиллани қайта ишлаш, ипак қурти уруғини ва бошқа турдаги маҳсулотларни ишлаб чиқариш корхоналари ишга туширилди. Бу ҳақда 7 январь куни АОКАда «Ўзбекипаксаноат» уюшмаси томонидан ўтказилган матбуот анжуманида маълум қилинди, дея хабар бермоқда «Дарё» мухбири.
Маълум қилинишича, ўтган йили Ўзбекистон тарихида илк бор бир йилда 4 марта ипак қурти боқиш ва ҳосил олиш тартиби йўлга қўйилди. Натижада 19 607 тонна пилла етиштирилди. Бу кўрсаткич 2018 йилга нисбатан 1,6 минг тонна ёки 8 фоизга кўп. Йил давомида етиштирилган пилланинг 70 фоизини қайта ишлашга эришиб, 70 миллион доллар миқдордаги маҳсулот экспорти амалга оширилган.
«Импорт ўрнини босувчи 150 минг қути саноатбоп ипак қурти уруғини ўзимизда ишлаб чиқардик. Бу жуда катта кўрсаткич. Чунки шу вақтга қадар Ўзбекистонда етиштириладиган пилла хом ашёсини етиштириш учун 100 фоиз ипак қуртларини импорт қилардик. Олдинлари ипак қурти уруғи етиштирадиган корхоналар ишлаган, лекин уларда инновацион ишланмалар етишмаганлиги, ипак қурти уруғларининг сифати пасайиб кетганлиги, зотларнинг бузилганлиги туфайли 2017 йилгача фаолияти қониқарли даражада эмас эди. Улар фақат «скалат»га ишлаган, уларни ипак қурти ўраб олган, аммо ҳеч ким боқмаган», — деди «Ўзбекипаксаноат» уюшмаси раис ўринбосари Олимжон Жумаев.
Тадбирда айтилишича, 2019 йилда соҳага салкам 68 миллион доллар миқдорида инвестиция киритилди. Унинг 33 миллион доллари тўғридан-тўғри хорижий инвестицияларни ташкил этади.
Хусусан, «Afghan Bazar Carpets” GmbH компанияси билан ҳамкорликда Ўзбекистонда сифатли ипакли гиламларни ишлаб чиқаришни йўлга қўйиш бўйича келишувга эришилди. Руминия ва Япония институтлари билан Ипакчилик илмий-тадқиқот институти ўртасида тажриба алмашиш ҳамда қўшма лойиҳалар асосида тадқиқотлар олиб бориш белгилаб олинди. Пиллачилик ва ипакчилик соҳаларида Озарбайжон билан ҳам ҳамкорлик алоқалари ўрнатилиб, Озарбайжон саноат корпорацияси билан англашув Меморандуми имзоланди. Ҳозирда Бирлашган Миллатлар Ташкилотининг Озиқ-овқат ва қишлоқ хўжалиги соҳасидаги ташкилоти (FAO) билан бир йиллик 120 минг долларга тенг лойиҳа амалга оширилмоқда.
Изоҳ (0)