Санкт-Петербургнинг Виборг тумани, Парголово посёлкасида маҳаллий аҳоли 30 декабрь, душанба куни кечки пайт икки нафар номаълум шахс бир эркакни қўлга олиб, оғзини пластир билан ёпиб, машинага ўтқазгани ва жўнаб кетганига гувоҳ бўлган. Бу ҳақда «Fontanka.ru» хабар бермоқда.
Полиция юз берган воқеа ҳақида шу куни соат 22:00 атрофида хабар топади. Ҳодиса жойига келиб, ўғирланган шахс гўшт комбинатида ишловчи 22 яшар ўзбекистонлик эканлиги аниқланади.
У ўша куни ҳамкасби билан ишдан қайтаётган бўлган. Уйга етиб келганларида уларга Hyundai Solaris машинаси яқинлашади ва ундан икки нафар славян миллатига мансуб эркак тушади ҳамда ўзбекистонликка бирга юришини айтади.
Бироз юриб, улар ўзбекистонликнинг 30 минг рублини тортиб олади ва ўзини машинадан тушириб юборади. У бу гал ўзи яшаётган уйгача саргузаштларсиз етиб олди.
Ҳозирда Виборг тумани полицияси ушбу ҳолат юзасидан текширув олиб бормоқда.
Изоҳ (0)