Peterburgda o‘zbekistonlik 22 yashar yigit Yangi yil arafasida o‘g‘irlab ketildi. Uning 30 ming rubl pulini olib, qo‘yib yuborishgan

Sankt-Peterburgning Viborg tumani, Pargolovo posyolkasida mahalliy aholi 30-dekabr, dushanba kuni kechki payt ikki nafar noma’lum shaxs bir erkakni qo‘lga olib, og‘zini plastir bilan yopib, mashinaga o‘tqazgani va jo‘nab ketganiga guvoh bo‘lgan. Bu haqda “Fontanka.ru” xabar bermoqda.

Politsiya yuz bergan voqea haqida shu kuni soat 22:00 atrofida xabar topadi. Hodisa joyiga kelib, o‘g‘irlangan shaxs go‘sht kombinatida ishlovchi 22 yashar o‘zbekistonlik ekanligi aniqlanadi.

U o‘sha kuni hamkasbi bilan ishdan qaytayotgan bo‘lgan. Uyga yetib kelganlarida ularga Hyundai Solaris mashinasi yaqinlashadi va undan ikki nafar slavyan millatiga mansub erkak tushadi hamda o‘zbekistonlikka birga yurishini aytadi.

Biroz yurib, ular o‘zbekistonlikning 30 ming rublini tortib oladi va o‘zini mashinadan tushirib yuboradi. U bu gal o‘zi yashayotgan uygacha sarguzashtlarsiz yetib oldi.

Hozirda Viborg tumani politsiyasi ushbu holat yuzasidan tekshiruv olib bormoqda.