Мудофаа вазирлигига қарашли «Фориш» тоғ дала-ўқув майдонида Марказий ҳарбий округ тасарруфидаги ҳарбий қисм ҳарбий хизматчилари мураккаб ва ҳаракатланиш қийин бўлган тоғли ҳудудларда жанговар вазифани бажариш бўйича машғулот ўтказди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
Хабар берилишича, ўтказилган тактик ўқув машғулотида ҳарбий хизматчилар тоғли ҳудудларда ҳаракатланиш, тоғ тайёргарлиги анжомларидан самарали фойдаланиш, тик ва ясси баландликларга арқон ёрдамида ва арқонсиз чиқиш ва тушиш, сой ва дарёлар, даралар устидан ўтиш ҳамда ярадорларни эвакуация қилиш бўйича қўйилган вазифаларни бажарди.
Шунингдек, қулай ва кўзга ташланмайдиган позицияларни эгаллаш, майдон кузатувини ташкил этиш, ҳужумга ўтиш, отиш позицияларини ўзгартириш, янги сўқмоқларни ташкил этиш каби машқлар бажарилган.
Ўтказилган ушбу машғулотлар ҳарбий хизматчиларнинг ўта мураккаб вазиятларда аниқ ва тезкор ҳаракатланишга, ноқулай шароитларда яшовчанлик кўникмалари ҳамда жанговар шайликни сақлаш борасидаги билимларини мустаҳкамлашга хизмат қилади.
Изоҳ (0)