Ўзбекистон ташқи интернет-каналининг 2019 йил охиридаги тезлиги сониясига 1200 гигабитни ташкил қилмоқда. Бу ҳақда Spot хабар берди.
«Ўзбектелеком»нинг маълум қилишича, айни пайтда мазкур тезлик Ўзбекистоннинг барча провайдер ва операторлари эҳтиёжини қондириш учун етарли ҳисобланади.
Компания 2018 йилнинг охирида интернет ўтказиш тезлигининг 10 мартага оширилишини маълум қилган эди. Ўша вақтга қадар тезлик сониясига 110 гигабитни ташкил қилган.
Ўшанда операторлар учун сониясига 1 мегабит тезликнинг нархи 169 минг сўмдан 85 минг сўмга туширилгани маълум қилинган. 2020 йилнинг 1 январидан бу нарх 56 минг сўмга тушиши кутилмоқда.
Компания томонидан хабар берилишича, симли интернетнинг тезлиги ўтган йил давомида сониясига 9,98 мегабитдан 21,47 мегабитга ошган. Бу кўрсаткич мамлакатнинг кабелли интернет тезлиги бўйича 180 та мамлакат орасида 108-ўринни эгаллашига имкон берди. Мобиль интернет тезлиги бўйича Ўзбекистон 139 та мамлакат орасида 135-ўринни эгаллаб турибди.
Изоҳ (0)