Сайловларда қонунбузилиш ҳолатлари бўлди

22 декабрь якшанба кунги сайловларнинг ўзига хос хусусияти нафақат ҳукуматнинг саъй-ҳаракатлари ва қонунчиликдаги ўзгаришлар, балки ижтимоий тармоқлар ва мессенжерларнинг ўзбекистонликларнинг ҳаётига оммавий кириб бориши туфайли юзага келган мисли кўрилмаган очиқлик деб аташ мумкин, деб ёзади «Gazeta.uz».

Олий Мажлис Қонунчилик палатаси ва халқ депутатлари маҳаллий Кенгашларига сайловлар «Янги Ўзбекистон—янги сайловлар» шиори остида ўтказилди.

Сайлов кампанияси, ҳақиқатан ҳам аввалгиларидан ёрқинроқ бўлди.

Жонли эфирда очиқ мунозаралар, илгари ҳеч қачон муҳокама қилинмаган кескин масалалар, партиялар ва ҳокимиятларга қарши танқидлар, бир фуқаронинг овозини қайта қабул қилишни истисно қиладиган сайловчиларнинг ягона реестри, участкалардаги камералар.

Жорий сайловларда фуқароларнинг иштироки 1991 йилдан бошлаб энг паст кўрсаткични қайд этиб, 71,1 фоизни ташкил этди. Бу кўрсаткич ҳам сайловларнинг ишончлилигига шубҳа қолдирмайди. Бироқ сайловолди кампаниялар чоғида янграган хавотирлар сайлов куни ўз тасдиғини топди.

Марказий сайлов комиссиясининг Тошкентда ҳар соатда ўтказилган брифингларда мансабдор шахслар томонидан сайловлар «уюшқоқлик» ҳамда «байрамона кўтаринки руҳда» ўтаётгани ҳақидаги гап-сўзлари фонида сайлов участкаларида майда (оила аъзолари номидан овоз беришга уриниш) ва жиддий қонунбузарлик ҳолатлари ҳақида хабарлар келиб туша бошлади.

Ўтказилган брифинглардан бирида айрим қонунбузарликлар ҳақида маълум қилинди.

Марказий сайлов комиссияси раисининг ўринбосари Маҳмуд Истамов Тошкентда қайд этилган маҳаллий ижро этувчи ҳокимият вакилларининг айрим депутатликка номзодларни илгари суриш учун сайлов комиссияларига босим ўтказган ҳолатларини маълум қилди.

Ушбу ҳолатлар прокуратура органлари томонидан текширилмоқда.

Ижтимоий тармоқларда участкалар сайлов комиссиялари аъзолари кузатувчиларга баённома тўлдириш жараёнида иштирок этишга қаршилик кўрсатаётгани, «қоралама» (сохта) баённомалардан фойдаланганлик, участка сайлов комиссияларида аллақачон овоз берилган бюллетенлар борлиги ҳақидаги хабарлар ва видеолар тарқалди.

Сайловларда номзод сифатида иштирок этган журналист ва блогер Нозим Сафаров Telegram-каналида «Бу яхши тажриба. Романтика ва ёлғон иллюзияларга берилишдан чеклайди», деб ёзди. У Сергели туманида ўтказилган сайловлар натижаларини бекор қилишга чақирди.

Ўзбекистон Бош прокуратураси Нозим Сафаров томонидан эълон қилинган қонун бузилиш ҳолати бўйича текширув бошланганини эълон қилди. Шунингдек, Марказий сайлов комиссияси ҳам ушбу ҳолатлар ўрганилишини айтди.

Бош прокуратура шунингдек, кун давомида сайловлардаги қонунбузарликлар ҳақида интернетдаги барча хабарларни кузатиб борилганини таъкидлади. Марказий сайлов комиссияси томонидан Бош прокуратурага йўналтирилган ҳолатлар орасида Қашқадарё вилояти Косон тумани кенгаши депутатлигига номзодни ўз номзодини бекор қилишга, Тошкент шаҳрининг Олмазор туманидаги 10, 22 ва 142-сонли участка сайлов комиссиялари ишига ноқонуний аралашишга мажбур қилиш ҳолатлари мавжуд.

«Прокурорлар ва терговчилардан иборат махсус гуруҳлар тузилди, ушбу маълумотларнинг ҳар бири диққат билан ўрганилмоқда. Марказий сайлов комиссияси билан яқин ҳамкорлик ва тезкор ахборот алмашиш йўлга қўйилди», — дейилади Бош прокуратура баёнотида.

Ҳуқуқшунос ва блогер Хушнудбек Худойбердиев сайлов куни қонун бузилиш ҳолатлари ҳақида 1800 та мурожаат олганини ёзди.

Мурожаатлардан энг муҳимларини у тегишли ташкилотларга йўналтирган.

«Ҳеч бир жамият хатодан ҳоли эмас, аммо энг яхши жамият хатоларни тан олади, тўғри муносабатда бўлади ва кенг жамоатчилик олдида ҳисобдорликни ҳис қилади. Мана шуниси ўта муҳим!», — деб ёзади Хушнудбек тезкор муносабат ва ҳамкорлик учун Марказий сайлов комиссияси ҳамда Бош прокуратурага миннатдорлик билдирган ҳолда.