Вазирлар Маҳкамасининг риэлторлик фаолиятини лицензиялаш тўғрисидаги маъмурий регламентни тасдиқлаш ҳақидаги қарори лойиҳаси муҳокама учун жойлаштирилди.
Белгиланишича, риэлторлик фаолиятини амалга ошириш учун лицензиялар олиш ҳақидаги аризалар фақат Давлат хизматлари марказлари ёки Ўзбекистон Республикасининг Ягона интерактив давлат хизматлари портали орқали қабул қилинади.
Риэлторлик фаолиятини лицензиялаш бўйича давлат хизмати кўрсатишнинг маъмурий регламенти тасдиқланади.
Давлат хизмати Давлат хизматлари марказлари ёки Ягона интерактив давлат хизматлари портали орқали Давлат активларини бошқариш агентлигининг Қорақалпоғистон Республикаси, вилоятлар ва Тошкент шаҳар ҳудудий бошқармалари томонидан амалга оширилади.
Риэлторлик фаолиятини амалга ошириш ҳуқуқини берувчи лицензия чекланмаган муддатга берилади.
Риэлторлик фаолиятини амалга оширувчи юридик шахслар кўрсатилаётган хизматлар қийматининг камида 15 фоизи миқдорида ҳақини олдиндан тўламасдан риэлторлик хизматлари кўрсатишга ҳақли.
Риэлторлик фаолияти қуйидаги риэлторлик хизматлари турларини кўрсатиш йўли билан амалга оширилади:
- кўчмас мулк объектларига ва уларга бўлган ҳуқуқларга доир битимлар тузиш чоғида воситачилик қилиш;
- кўчмас мулк объектларининг ва уларга бўлган ҳуқуқларнинг савдосини ташкил этиш;
- кўчмас мулк объектларини ишончли бошқариш.
- Жисмоний ва юридик шахслар томонидан кўчмас мулк бозорида ахборот ва маслаҳат хизматларини амалга ошириш учун лицензия олиш талаб этилмайди.
Қуйидагилар риэлторлик фаолиятини амалга оширишдаги лицензия талаблари ва шартлари ҳисобланади:
а) лицензия томонидан риэлторлик фаолиятини амалга ошириш соҳасидаги қонун ҳужжатларига риоя қилиш;
б) риэлторлик ташкилотининг риэлторлик хизматлари буюртмачиси олдидаги риэлторлик ташкилотлари ушбу Регламентда белгиланган ҳажмдан кам бўлмаган миқдордаги фуқаролик мажбурий суғурта полисининг мавжуд бўлиши;
в) ҳар уч йилда ходимларининг малакасини оширишни таъминлаш;
г) риэлторлик хизматлари кўрсатишда олинган ахборотларнинг махфийлигини таъминлаш;
д) ҳар ярим йилда бир марта Ўзбекистон Республикаси Давлат активларини бошқариш агентлигига риэлторлик фаолияти тўғрисидаги маълумотларни белгиланган шакл бўйича тақдим этиш;
е) риэлторлик ташкилоти раҳбари лавозимига фақат риэлторнинг малака сертификатига эга бўлган ходимни тайинлаш;
ё) риэлторлик ташкилоти штатида риэлторнинг малака сертификатига эга бўлган камида икки нафар ходимнинг бўлиши.
Ушбу банднинг «б», «в», «е» ва «ё» кичик бандлари талаблари риэлторлик фаолиятини амалга оширишда риэлторга (жисмоний шахсга) татбиқ этилмайди.
Қуйидагилар:
- кўчмас мулк объектларига ва уларга бўлган ҳуқуқларга доир битимлар тузиш чоғида воситачилик қиладиган риэлторлик ташкилотлари — базавий ҳисоблаш миқдорининг 500 бараварига тенг миқдорда ўзининг фуқаролик мажбурияти мажбурий суғурта қилинган бўлиши;
- кўчмас мулк объектларини ишончли бошқаришни амалга оширадиган риэлторлик ташкилотлари — базавий ҳисоблаш миқдорининг 1000 бараварига тенг миқдорда ўзининг фуқаролик мажбурияти мажбурий суғурта қилинган бўлиши;
- кўчмас мулк объектлари ва уларга бўлган ҳуқуқлар савдосини ташкил этадиган риэлторлик ташкилотлари — базавий ҳисоблаш миқдорининг 3000 бараварига тенг миқдорда ўзининг фуқаролик мажбурияти мажбурий суғурта қилинган бўлиши лозим.
Изоҳ (0)