Қашқадарё вилояти сайлов комиссияси Миришкор туманида овоз бериш жараёни якунланиши билан сайлов участкасида чироқ ўчгани, шундан кейин сайлов комиссияси аъзолари сайлов қутисига сохта бюллетенларни ташлашга урингани ҳолати юзасидан муносабат билдирди.
Маълум бўлишича, Facebook ижтимоий тармоғининг «Халқ билан мулоқот» гуруҳидаги блогер Каримберди Тўрамуроднинг «Кўрдим, чироқни ёқ!» сарлавҳали хабари эълон қилинган. Унда блогер 22 декабрь куни Миришкор тумани Жейнов шаҳарчасидаги 850-Каттапой сайлов манзилида рўй берган ҳолат видеосини жойлаган.
Видеода соат 20:00 да чироқ ўчиши билан сайлов комиссияси ходимлари Қашқадарё вилояти кенгаши депутатлигига номзод бўлган Абдувоҳид Турдиалиевич Бегалиев фойдасига тўлдирилган бюллетенлар боғлами сайлов қутисига ташлаб юборилгани ҳақида айтилган.
Қашқадарё вилояти сайлов комиссияси ушбу ҳолат ўрганиб чиқилганини билдирди. Унда қайд этилишича, Сайлов кодексининг 96-моддасида сайлов давомида йўл қўйилган, овоз бериш якунларига таъсир қилган қоидабузарликлар сабабли сайлов умуман ёки айрим сайлов округлари бўйича ёхуд айрим сайлов участкалари бўйича ҳақиқий эмас деб топилиши мумкинлиги белгиланган.
Жиноят кодексининг 146-моддасида сайлов комиссиялари аъзолари томонидан сайлов ҳужжатларини қалбакилаштириш, сайлов ёки имзо варақаларига сохта ёзувлар киритиш, берилган овозларни атайлаб нотўғри ҳисоблаш учун жиноий жавобгарлик белгиланган.
Жиноят кодексининг 10-моддасида қилмишида жиноят таркибининг мавжудлиги аниқланган ҳар бир шахс жавобгарликка тортилиши шарт деб таъкидлаб ўтилган.
Хабар ва унга илова қилинган видеотасвирдаги маълумотлар ҳуқуқий баҳо берилиши учун Миришкор туман прокуратурасига тақдим этилган.
Мавзуга доир:
- Чирчиқда депутатликка номзод сайлов куни ташвиқот ўтказгани ҳақидаги хабар юзасидан қўшимча ахборот берилди
- Бош прокуратура блогер томонидан эълон қилинган Сергели тумани сайлов участкасидаги ҳолатни текширишни бошлади
- Яшнободда сайловларга аралашиш ҳолати юзасидан суриштирув олиб борилмоқда. Воқеа жойига журналистлар етиб борган
Изоҳ (0)