Saylovlarda qonunbuzilish holatlari bo‘ldi

22-dekabr yakshanba kungi saylovlarning o‘ziga xos xususiyati nafaqat hukumatning sa’y-harakatlari va qonunchilikdagi o‘zgarishlar, balki ijtimoiy tarmoqlar va messenjerlarning o‘zbekistonliklarning hayotiga ommaviy kirib borishi tufayli yuzaga kelgan misli ko‘rilmagan ochiqlik deb atash mumkin, deb yozadi “Gazeta.uz”.

Oliy Majlis Qonunchilik palatasi va xalq deputatlari mahalliy Kengashlariga saylovlar “Yangi O‘zbekiston—yangi saylovlar” shiori ostida o‘tkazildi.

Saylov kampaniyasi, haqiqatan ham avvalgilaridan yorqinroq bo‘ldi.

Jonli efirda ochiq munozaralar, ilgari hech qachon muhokama qilinmagan keskin masalalar, partiyalar va hokimiyatlarga qarshi tanqidlar, bir fuqaroning ovozini qayta qabul qilishni istisno qiladigan saylovchilarning yagona reyestri, uchastkalardagi kameralar.

Joriy saylovlarda fuqarolarning ishtiroki 1991-yildan boshlab eng past ko‘rsatkichni qayd etib, 71,1 foizni tashkil etdi. Bu ko‘rsatkich ham saylovlarning ishonchliligiga shubha qoldirmaydi. Biroq saylovoldi kampaniyalar chog‘ida yangragan xavotirlar saylov kuni o‘z tasdig‘ini topdi.

Markaziy saylov komissiyasining Toshkentda har soatda o‘tkazilgan brifinglarda mansabdor shaxslar tomonidan saylovlar “uyushqoqlik” hamda “bayramona ko‘tarinki ruhda” o‘tayotgani haqidagi gap-so‘zlari fonida saylov uchastkalarida mayda (oila a’zolari nomidan ovoz berishga urinish) va jiddiy qonunbuzarlik holatlari haqida xabarlar kelib tusha boshladi.

O‘tkazilgan brifinglardan birida ayrim qonunbuzarliklar haqida ma’lum qilindi.

Markaziy saylov komissiyasi raisining o‘rinbosari Mahmud Istamov Toshkentda qayd etilgan mahalliy ijro etuvchi hokimiyat vakillarining ayrim deputatlikka nomzodlarni ilgari surish uchun saylov komissiyalariga bosim o‘tkazgan holatlarini ma’lum qildi.

Ushbu holatlar prokuratura organlari tomonidan tekshirilmoqda.

Ijtimoiy tarmoqlarda uchastkalar saylov komissiyalari a’zolari kuzatuvchilarga bayonnoma to‘ldirish jarayonida ishtirok etishga qarshilik ko‘rsatayotgani, “qoralama” (soxta) bayonnomalardan foydalanganlik, uchastka saylov komissiyalarida allaqachon ovoz berilgan byulletenlar borligi haqidagi xabarlar va videolar tarqaldi.

Saylovlarda nomzod sifatida ishtirok etgan jurnalist va bloger Nozim Safarov Telegram-kanalida “Bu yaxshi tajriba. Romantika va yolg‘on illyuziyalarga berilishdan cheklaydi”, deb yozdi. U Sergeli tumanida o‘tkazilgan saylovlar natijalarini bekor qilishga chaqirdi.

O‘zbekiston Bosh prokuraturasi Nozim Safarov tomonidan e’lon qilingan qonun buzilish holati bo‘yicha tekshiruv boshlanganini e’lon qildi. Shuningdek, Markaziy saylov komissiyasi ham ushbu holatlar o‘rganilishini aytdi.

Bosh prokuratura shuningdek, kun davomida saylovlardagi qonunbuzarliklar haqida internetdagi barcha xabarlarni kuzatib borilganini ta’kidladi. Markaziy saylov komissiyasi tomonidan Bosh prokuraturaga yo‘naltirilgan holatlar orasida Qashqadaryo viloyati Koson tumani kengashi deputatligiga nomzodni o‘z nomzodini bekor qilishga, Toshkent shahrining Olmazor tumanidagi 10, 22 va 142-sonli uchastka saylov komissiyalari ishiga noqonuniy aralashishga majbur qilish holatlari mavjud.

“Prokurorlar va tergovchilardan iborat maxsus guruhlar tuzildi, ushbu ma’lumotlarning har biri diqqat bilan o‘rganilmoqda. Markaziy saylov komissiyasi bilan yaqin hamkorlik va tezkor axborot almashish yo‘lga qo‘yildi”, — deyiladi Bosh prokuratura bayonotida.

Huquqshunos va bloger Xushnudbek Xudoyberdiyev saylov kuni qonun buzilish holatlari haqida 1800 ta murojaat olganini yozdi.

Murojaatlardan eng muhimlarini u tegishli tashkilotlarga yo‘naltirgan.

“Hech bir jamiyat xatodan holi emas, ammo eng yaxshi jamiyat xatolarni tan oladi, to‘g‘ri munosabatda bo‘ladi va keng jamoatchilik oldida hisobdorlikni his qiladi. Mana shunisi o‘ta muhim!”, — deb yozadi Xushnudbek tezkor munosabat va hamkorlik uchun Markaziy saylov komissiyasi hamda Bosh prokuraturaga minnatdorlik bildirgan holda.