«Дарё»да қашқадарёлик 54 ёшли аёл фуқаролик паспортида эркак бўлиб қолгани боис нафақага чиқолмай сарсон бўлаётгани ҳақида ёзилганди. Қамаши туман ҳокимлиги ахборот хизмати мазкур хабарга муносабат билдирди.
Ҳокимлик ахборот хизматининг ёзишича, ушбу ҳолатга аниқлик киритиш мақсадида Қамаши туман ИИБ Миграция ва фуқароликни расмийлаштириш бўлими бошлиғи, майор Чориёр Маҳмудов билан суҳбатлашилган.
— Дарҳақиқат, Бибихол Эшмирзаеванинг фуқаролик паспортидаги жинси кўрсатиладиган жойга «эркак» деб кўрсатиб кетилган, — дейди Чориёр Маҳмудов. — 2015 йилда фуқарога паспорт берилиши вақтида эътиборсизлик сабаб компьютер базасига «эркак» деб киритилган. Ушбу ҳолат юзасидан мурожаат қилинганда фуқаролик паспортига жинси кўрсатиладиган жойга «аёл» деб киритиб берилган. Бироқ базада «эркак» бўлиб қолаверган. Пенсияга чиқиш вақтида фуқаро пенсия таъминотига бориб, базада ушбу паспорт эгаси «эркак» бўлиб турганини билган. 2019 йилнинг 23 октябрида фуқаролик паспортини қайта олиш учун мурожаат қилган Бибихол Эшмирзаевага 2019 йилнинг 27 ноябрь куни фуқаролик паспорти берилди.
Ушбу ҳолат юзасидан эътиборсизлик қилган ходимга хизмат текшируви тайинланди.
Қамаши туман пенсия жамғармаси туман бўлими мутахассиси ушбу ҳолатга қуйидагича изоҳ беради.
— Фуқаро Бибихол Эшмирзаева бизга пенсияга чиқиш бўйича мурожаат қилганди. Фуқаролик паспорти бўйича маълумотларни базага киритиш вақтида жинси «эркак» бўлиб чиқди. Юртимизда эркаклар учун пенсияга чиқиш ёши 60 ёш қилиб белгиланган. Базада эркак бўлиб киртилган фуқаро 60 ёшдан пенсияга чиқиши лозим. Фуқаролик паспортидаги маълумотлар ўзгартириб берилса, белгиланган тартибда пенсияга чиқарилади.
— Хато ҳаммада ҳам учрайди. Бироқ ушбу хатоларни вақтида тўғирлаш лозимлигини унутмаслигимиз шарт, — дейилади туман ҳокимлиги ахборот хизмати хабарномасида.
Изоҳ (0)