Давлат органларидан келган мурожаатлар сабабли 2019 йил 1 декабрдан бошлаб «OLX.uz» хизматида массаж рекламаси тўхтатилади. Бу ҳақда «OLX.uz» хизмати ўз сайтида маълум қилди.
Хизмат фойдаланувчилардан тугаш санаси 2019 йил 30 ноябрдан кейин бўлган пулли хизматларини қўлламасликни сўраган. Шунингдек, аккаунтларнинг блокланиб қолмаслиги учун фойдаланувчилардан 30 ноябрь куни массаж хизматлари ҳақидаги эълонларни мустақил равишда ўчириш сўралган. Мазкур санада ўчирилмаган эълонлар аккаунтнинг блокдан чиқарилишига имкон бермайди.
Хизмат томонидан маълум қилинишича, агар фойдаланувчи 30 ноябрдан кейин тугайдиган пулли хизматни қўллаган бўлса, у «OLX.uz» маъмуриятига қайта алоқа шакли орқали мурожаат қилиши мумкин. Шундагина пулли хизмат бекор қилинади ва ишланмаган вақт учун маблағлар фойдаланувчининг «OLX.uz»даги шахсий кабинетига қайтарилади.
Шахсий кабинетда қолган пул маблағларини пластик картага қайтариш учун фойдаланувчи қайта алоқа шакли орқали боғланиб, карта рақами, исм-фамилия ва картага бириктирилган телефон рақамини маълум қилиши керак.
Хизмат фойдаланувчига пул маблағларини у томонидан сайтда эълон жойлаштириш қоидалари бузилмаган бўлса, қайтариб беради. Бунинг учун фойдаланувчи 28 ноябргача мурожаат қилиши керак. Солиқ ҳисоботлари сабабли, бу санадан кейин мурожаат қилинган тақдирда, пул маблағларини қайтаришнинг имкони бўлмайди.
Фойдаланувчи томонидан массаж ҳақидаги эълонларда шахсий, сохта, интим суратлар жойлаштирилган бўлса, аккаунт блокдан чиқарилмайди ва пул маблағлари қайтарилмайди. Шунингдек, фойдаланувчига огоҳлантириш берилиб, эълони қайтарилган бўлса, шунингдек, эълон қайтарилмасдан, сурат ўчирилган бўлса ҳам, унинг аккаунти блокланган ҳолда қолади ва пули қайтариб берилмайди.
2019 йил 1 декабрдан массаж хизматлари ҳақидаги барча эълонлар ва аккаунтлар автоматик тарзда блокировка қилинади. Аккаунтлар қайта тикланмайди ва пул маблағлари қайтарилмайди.
Изоҳ (0)