Ижтимоий тармоқларда Тошкентда Lacetti русумли автомобиль орқага ҳаракатланиб, ЙПХ ходимларидан қочаётгани, аммо кейинчалик тўхтатилгани акс этган видеоёзув жойланди. Видео остида қолдирилган шарҳда ҳайдовчининг ҳаракатларига унинг кучли таъсир ўтказувчи воситалар истеъмол қилгани сабаб бўлгани тахмин қилинган.
ИИББ матбуот хизмати ушбу ҳолат бўйича қуйидагиларни маълум қилди:
21 ноябрь куни соат 01:25 атрофида Яшнобод тумани Фарғона йўли кўчасида Lacetti русумли автомобилнинг ҳаракатланиши ЙПХ инспекторларида гумон уйғотди. Ҳайдовчига тўхташ ҳақида ишора берилди. Аммо у ишорага бўйсинмасдан ҳаракатни давом эттирди.
ЙПХ экипажи хизмат автомобилида қоидабузарнинг ортидан йўл олди. Натижада автомобиль MEGA MED клиникаси ёнидаги йўл ҳудудида тўхтатилди, шу ерда ҳайдовчи орқага ҳаракатланиб воқеа жойини тарк этмоқчи бўлган. Айнан шу жой ҳодисани мобил телефонига тушираётган видеооператор кадрига тушиб қолди.
Қоидабузарнинг ушбу ҳаракатлари ЙПХ инспектори томонидан тўхтатилгач, ҳайдовчи транспорт воситасини бошқаришдан четлатилди. Ҳодиса фуқароларнинг эътиборини тортганлиги сабабли ҳайдовчи инспекторлар томонидан хизмат автомобилига таклиф этилгач, дастлабки тўхтатилган жойга маъмурий ҳуқуқбузарлик тўғрисида баённома тузиш учун олиб кетилди.
«Lacetti»ни бошқарган шахс Қорақалпоғистон Республикасида яшовчи 28 ёшли Шерзод С. эканлиги маълум бўлди. Кейинчалик айтган гапларига қараганда, унинг ҳаракатларига транспорт воситасини бошқариш учун зарур бўлган ишончнома ва мажбурий суғурта ҳақидаги полиси йўқлиги сабаб бўлган. Ҳайдовчига нисбатан Маъмурий жавобгарлик тўғрисидаги кодекснинг 135-моддасига («Йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши») ва 194-моддасига («Ички ишлар органлари ходимининг қонуний талабларини бажармаслик») мувофиқ баённома расмийлаштирилди.
Ҳайдовчига нисбатан чоралар ҳақидаги қарорни суд қабул қилади. Қоидабузар автомобили юқоридаги Кодекснинг 291-моддасига мувофиқ жарима майдончасига жойланди.
Изоҳ (0)