Ijtimoiy tarmoqlarda Toshkentda Lacetti rusumli avtomobil orqaga harakatlanib, YPX xodimlaridan qochayotgani, ammo keyinchalik to‘xtatilgani aks etgan videoyozuv joylandi. Video ostida qoldirilgan sharhda haydovchining harakatlariga uning kuchli ta’sir o‘tkazuvchi vositalar iste’mol qilgani sabab bo‘lgani taxmin qilingan.
IIBB matbuot xizmati ushbu holat bo‘yicha quyidagilarni ma’lum qildi:
21-noyabr kuni soat 01:25 atrofida Yashnobod tumani Farg‘ona yo‘li ko‘chasida Lacetti rusumli avtomobilning harakatlanishi YPX inspektorlarida gumon uyg‘otdi. Haydovchiga to‘xtash haqida ishora berildi. Ammo u ishoraga bo‘ysinmasdan harakatni davom ettirdi.
YPX ekipaji xizmat avtomobilida qoidabuzarning ortidan yo‘l oldi. Natijada avtomobil MEGA MED klinikasi yonidagi yo‘l hududida to‘xtatildi, shu yerda haydovchi orqaga harakatlanib voqea joyini tark etmoqchi bo‘lgan. Aynan shu joy hodisani mobil telefoniga tushirayotgan videooperator kadriga tushib qoldi.
Qoidabuzarning ushbu harakatlari YPX inspektori tomonidan to‘xtatilgach, haydovchi transport vositasini boshqarishdan chetlatildi. Hodisa fuqarolarning e’tiborini tortganligi sababli haydovchi inspektorlar tomonidan xizmat avtomobiliga taklif etilgach, dastlabki to‘xtatilgan joyga ma’muriy huquqbuzarlik to‘g‘risida bayonnoma tuzish uchun olib ketildi.
“Lacetti”ni boshqargan shaxs Qoraqalpog‘iston Respublikasida yashovchi 28 yoshli Sherzod S. ekanligi ma’lum bo‘ldi. Keyinchalik aytgan gaplariga qaraganda, uning harakatlariga transport vositasini boshqarish uchun zarur bo‘lgan ishonchnoma va majburiy sug‘urta haqidagi polisi yo‘qligi sabab bo‘lgan. Haydovchiga nisbatan Ma’muriy javobgarlik to‘g‘risidagi kodeksning 135-moddasiga (“Yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi”) va 194-moddasiga (“Ichki ishlar organlari xodimining qonuniy talablarini bajarmaslik”) muvofiq bayonnoma rasmiylashtirildi.
Haydovchiga nisbatan choralar haqidagi qarorni sud qabul qiladi. Qoidabuzar avtomobili yuqoridagi Kodeksning 291-moddasiga muvofiq jarima maydonchasiga joylandi.
Izoh (0)