Тошкентда гиёҳванд моддалар сотиладиган сайтни реклама қилувчи баннерлар аниқланди. Буни дастлаб журналист Муҳаммадшариф Маматқулов Тошкентдаги Оҳангарон йўлида ўрнатилган баннерда пайқаб қолган ва бу ҳақда ҳуқуқни муҳофаза қилувчи идораларга хабар берган (сўнгги маълумотларга кўра, баннер олиб ташланган). Бундай баннерлар Самарқандда ҳам борлиги айтилмоқда. Маълум бўлишича, баннердаги сайтни ўзбекистонлик блогер қиз ўзи билмаган ҳолда реклама ҳам қилиб қўйган.
Ўзбекистонда уч даражали пенсия тизими жорий қилинади. Бунда, биринчи даражада, давлат минимал пенсия миқдорини белгилайди. Иккинчи даражада ходимнинг иш ҳақидан муайян сумма ушланиб, унинг шахсий ҳисобварағида тўпланади ва Марказий банк қайта молиялаштириш ставкасидан кам бўлмаган фоиз ҳисоблаб борилади. Учинчи даражада эса ходим пенсия жамғармасига ажратиладиган маблағ миқдорини ўзи белгилайди. Бу — Президент топшириғи, фақат қачон амалга оширилиши ҳозирча маълум қилингани йўқ.
Самарқандда товламачилиги учун қўлга олинган «мухбир»нинг «Kun.uz»га алоқаси йўқ. Маълум бўлишича, Каттақўрғон туманида яшовчи, маҳаллий босма нашрлардан бирида ишловчи журналист Ш.Қ. ўзини «Kun.uz» мухбири деб таништириб, тумандаги боғчалардан бирининг мудирасидан 3000 доллар пул талаб қилган (у аввал ҳам товламачиликда айбланиб, 3 йил «ўтириб» чиққан). Воқеа октябрда бўлган, ҳозирда тергов-суриштирув ишлари олиб борилмоқда.
«Ўзстандарт» Red Bull энергетик ичимлигига сертификат беришни рад этди. Нега бирдан? Ичимлик ёрлиғидаги маълумотлар давлат тилида (яъни, ўзбек тилида) мавжуд бўлмаганлиги сабабли маҳсулотга мувофиқлик сертификати расмийлаштириш рад этилган. Бу ичимликни Ўзбекистонга Миролим Мираҳматов раҳбарлигидаги New Optimal компанияси импорт қиларкан — бозор ўзбекча ёрлиғи йўқ маҳсулотларга тўлиб ётган бир вақтда айнан Red Bull’га «ташланиб қолишгани» ғалати.
Хориждаги ўзбекистонликлар ҳақида. Қозоғистоннинг салкам икки йил аввал 52 ўзбекистонлик ёниб кетган вилоятида бу сафар 55 нафар ўзбекистонликни олиб кетаётган автобус қаҳратон йўл ўртасида бузилиб қолди — ҳамма қутқарилган, ўзбекистонликлар орасида тиббий ёрдамга муҳтожлар йўқлиги айтилмоқда. Россиянинг Воронежида эса фожиа — 13-қаватдан тушган ғиштлар босиб қолиши оқибатида ўзбекистонлик икки меҳнат муҳожири ҳалок бўлган.
Дунёда нима гап? Трампни мамлакат учун «қиёси йўқ хавф» деб ҳисоблайдиган миллиардер Майкл Блумберг АҚШ президенти сайловида иштирок этиш учун керакли ҳужжатларни Федерал сайлов комиссиясига топширди — у ўз вақтида Нью-Йорк шаҳрини анча яхши бошқарган. Россия президенти Владимир Путин эса Северодвинскда ҳалок бўлган мутахассислар «дунёда муқобили йўқ қурол» устида иш олиб боргани, Россия нима бўлишидан қатъий назар бу қуролни ишлаб чиқишини маълум қилди. Исроил бош прокурори эса мамлакат бош вазири Бенямин Нетаняҳуга нисбатан учта жиноят иши бўйича айблов эълон қилиш ниятида эканини билдирди — улар орасида порахўрлик бўйича иш ҳам бор.
Изоҳ (0)