Қонунчилик палатаси депутатлари таълим ва соғлиқни сақлашга ажратилган маблағлар ўзлаштирилмай қолганини танқид қилди

Қонунчилик палатаси мажлисида депутатлар Вазирлар Маҳкамаси томонидан тақдим этилган Ўзбекистон Республикаси давлат бюджетининг ва давлат мақсадли жамғармалари бюджетларининг 2019 йил тўққиз ойлигидаги ижроси тўғрисидаги ҳисоботни кўриб чиқди. Бу ҳақда палата матбуот хизмати маълум қилди.

Мазкур ҳисобот аввалроқ қуйи палатанинг Бюджет ва иқтисодий ислоҳотлар қўмитасида, сиёсий партиялар фракциялари ҳамда Экоҳаракат депутатлар гуруҳи йиғилишларида дастлабки тарзда муҳокама қилинган эди.

Ўзбекистон Республикаси давлат бюджетининг ва давлат мақсадли жамғармалари бюджетларининг 2019- йил тўққиз ойлигидаги ижроси тўғрисидаги ҳисоботни Молия вазирининг ўринбосари А.Ҳайдаров тақдим этди.

Жорий йилнинг тўққиз ойида ялпи ички маҳсулотнинг ўсиши 5,7 фоизни ташкил этди. Давлат бюджети даромадлари 79,2 триллион сўмни, харажатлари эса 86,5 триллион сўмни ташкил этиб, ялпи маҳсулотдаги улуши тегишинча 21,9 ва 23,9 фоизни ташкил этган.

Ҳисобот даврида ташқи савдо айланмаси 31,6 миллиард АҚШ долларини ташкил этиб, ўтган йилнинг мос даврига нисбатан 37,2 фоиз ошган, экспорт ҳажми 13,7 миллиард долларни ва импорт ҳажми 18,0 миллиард долларни ташкил қилган.

Харажатларнинг ижтимоий йўналтирилганлиги сақлаб қолиниб, ижтимоий харажатларни молиялаштириш учун давлат бюджетидан 45,9 триллион сўм ёки умумий харажатларнинг 53,2 фоизи миқдорида маблағ сарфланган. Бу харажатлар ЯИМга нисбатан 12,7 фоизни ташкил этган.

Депутатлар ҳисобот даврида таълим тизими муассасаларини сақлаш ва уларни ривожлантириш харажатларига ажратилган 1 триллион 236,5 миллиард, соғлиқни сақлаш соҳасининг айрим тадбирларини амалга оширишга ва бошқа мақсадлар учун ажратилган маблағларнинг 519,6 миллиард сўми ўзлаштирилмай қолганини танқид остига олди.

Ҳукумат ҳисоботи юзасидан ҳар бир сиёсий партия фракцияси ҳамда Ўзбекистон Экологик ҳаракати депутатлар гуруҳи вакиллари ўз нуқтаи назарини баён қилди.

Қизғин муҳокамалардан сўнг Олий Мажлис Қонунчилик палатаси давлат бюджетининг ва давлат мақсадли жамғармалари бюджетларининг 2019 йил тўққиз ойлигидаги ижроси тўғрисидаги ҳисоботни тасдиқлаш юзасидан қарор қабул қилди.