Афғонистон Савдо-саноат палатаси раиси ўринбосари Муҳаммад Муҳсин Амирий раҳбарлигидаги ишбилармонлар делегацияси Сурхондарёга келди. Бу ҳақда вилоят ҳокимлиги ахборот хизмати маълум қилди.
Ўзаро савдо-иқтисодий ва инвестициявий ҳамкорликни кенгайтириш мақсадида ташриф буюрган делегация аъзолари вилоят ҳокими Тўра Боболов билан учрашди.
Жорий йилнинг ўтган даврида қўшни мамлакатга вилоятдан 45 миллион доллардан ортиқ қийматдаги маҳсулотлар экспорт қилинди. 2019—2020 йилларда афғон тадбиркорлари ҳамкорлигида воҳада саноат, қишлоқ хўжалиги ва хизмат кўрсатиш соҳаларида қиймати 46 миллион доллар бўлган 40 та лойиҳани амалга оширишга келишилган.
Учрашув чоғида вилоятда қишлоқ хўжалиги маҳсулотларини ишлаб чиқариш, сақлаш, қайта ишлаш ва экспорт қилиш, экспортга йўналтирилган қурилиш маҳсулотлари ишлаб чиқаришни кенгайтириш, тоғ-кон тармоғини ривожлантириш ва бошқа инвестиция лойиҳаларини амалга ошириш юзасидан ўзаро фикр алмашилди.
Афғонистонлик ишбилармонлар билан бўлиб ўтган учрашув чоғида заъфарон ўсимлиги, шунингдек, дунёга машҳур Жалолобод анорларини Сурхондарёда етиштиришни йўлга қўйиш масаласида ҳам келишиб олиниб, ҳар бир келишувнинг муваффақиятли амалга оширилиши учун барча имкониятлар ишга солиниши таъкидланди.
Изоҳ (0)