Жорий йилнинг 10 ойи давомида пойтахтда турли соҳаларда ноқонуний равишда ишлаётган 148 минг 710 нафар фуқаро фаолияти қонунийлаштирилди. Бу ҳақда Тошкент шаҳар солиқ бошқармаси матбуот хизмати «Дарё»га хабар берди.
Натижада солиқ базаси кенгайиб, бюджетга қўшимча 12,2 миллиард сўм жалб этилди.
Ушбу рақамлар соҳалар кесимида таҳлил этилганида ишлаб чиқариш соҳасида 57 минг 500 нафар, қурилишда 18 минг 900 нафар, чакана савдода 18 минг 300 нафар, умумий овқатланиш корхоналарида 7 минг нафар, хизмат кўрсатишда 6 минг 900 нафар ва бошқа соҳаларда ишлаётган 40 минг нафардан зиёд фуқаро жисмоний шахсларнинг даромад солиғи тўловчиси сифатида рўйхатдан ўтказилган.
Тошкент шаҳар давлат солиқ хизмати органлари томонидан ўтказилган назорат тадбирларида Яшнобод тумани, С.Машҳадий кўчаси 6-уйда жойлашган умумий овқатланиш шохобчасида 15 нафар фуқаро меҳнат шартномаси тузмасдан ишлаётгани аниқланди.
Шунингдек, пойтахтнинг Олмазор тумани Беруний кўчасида жойлашган савдо дўкони фаолияти ўрганилганида, давлат солиқ хизмати органларига тақдим этилган ҳисоботларда кўрсатилмаган 12 нафар фуқаро норасмий равишда ишлаётгани маълум бўлди.
Изоҳ (0)