Олий Мажлис Сенати раисининг биринчи ўринбосари Содиқ Сафоев бошчилигидаги Ўзбекистон делегацияси расмий ташриф билан Италияда бўлиб турибди. Бу ҳақда Сенат матбуот хизмати маълум қилди.
Ташриф чоғида Ўзбекистон ишбилармон доиралари вакиллари Италиянинг қатор компаниялари мутасаддилари билан учрашувлар ўтказиб, муҳим келишувларга эришди.
Делегация аъзолари дастлаб «Паблисис Групп» компанияси билан ҳамкорлик имкониятларини муҳокама қилди.
Учрашувда компания президенти Анжело Баёччи сўнгги уч йилда Ўзбекистонда амалга оширилаётган иқтисодий ислоҳотлар натижаларига юқори баҳо берди. Шунингдек, Анжело Баёччи Ўзбекистоннинг жаҳон цивилизациясида алоҳида ўрин тутувчи бой маданий-маънавий меросига алоҳида урғу бериб, бу борада Ғарб ва Осиё давлатлари бўйлаб кенг тарғибот ишларини ўтказиш таклифини билдирди. Ўзбекистонда бўлаётган ўзгаришлардан жаҳон ҳамжамиятини доимий хабардор қилиб бориш, мамлакатнинг ижобий имижини шакллантириш ва нуфузини оширишда дунёнинг етакчи ОАВлари ва йирик медиа тузилмалари билан ҳамкорлик қилиш масалаларида «Паблисис Групп» компанияси ҳар қандай кўмакка тайёр экани таъкидланди.
Бундан ташқари, делегация аъзолари «Инзакт» компанияси таъсисчиси ва бошқарувчиси Давид Ронкалони билан учрашди.
Муҳокамалар чоғида томонлар Ўзбекистонда озиқ-овқат хавфсизлигини янада мустаҳкамлаш, қишлоқ хўжалиги ишлаб чиқаришини изчил ривожлантириш, экологик тоза маҳсулотлар ишлаб чиқаришни кенгайтириш, аграр секторнинг экспорт салоҳиятини ошириш масалаларида ўзаро фикр алмашди.
Давид Ронкалони Ўзбекистонда етиштирилаётган мева-сабзавот ва озиқ-овқат маҳсулотларини сертификатлаш ва экспортни тарғиб қилиш, бунинг учун тақиқланган кимёвий ва генетик модификацияланган организмлардан (ГМО) маҳсулотларнинг «тозалигини» тасдиқловчи мураккаб босқичли лаборатория тадқиқотлари тизимини жорий этишда ҳамкорликка шай эканини билдирди.
Музокаралар якунида томонлар ўзаро ҳамкорлик муносабатларини йўлга қўйиш ва ривожлантириш юзасидан «Йўл харитаси»ни ишлаб чиқиш ҳамда келишилган мақсадларни амалга ошириш борасида келишиб олди.
Изоҳ (0)