Toshkentda giyohvand moddalar sotiladigan saytni reklama qiluvchi bannerlar aniqlandi. Buni dastlab jurnalist Muhammadsharif Mamatqulov Toshkentdagi Ohangaron yo‘lida o‘rnatilgan bannerda payqab qolgan va bu haqda huquqni muhofaza qiluvchi idoralarga xabar bergan (so‘nggi ma’lumotlarga ko‘ra, banner olib tashlangan). Bunday bannerlar Samarqandda ham borligi aytilmoqda. Ma’lum bo‘lishicha, bannerdagi saytni o‘zbekistonlik bloger qiz o‘zi bilmagan holda reklama ham qilib qo‘ygan.
O‘zbekistonda uch darajali pensiya tizimi joriy qilinadi. Bunda, birinchi darajada, davlat minimal pensiya miqdorini belgilaydi. Ikkinchi darajada xodimning ish haqidan muayyan summa ushlanib, uning shaxsiy hisobvarag‘ida to‘planadi va Markaziy bank qayta moliyalashtirish stavkasidan kam bo‘lmagan foiz hisoblab boriladi. Uchinchi darajada esa xodim pensiya jamg‘armasiga ajratiladigan mablag‘ miqdorini o‘zi belgilaydi. Bu — Prezident topshirig‘i, faqat qachon amalga oshirilishi hozircha ma’lum qilingani yo‘q.
Samarqandda tovlamachiligi uchun qo‘lga olingan “muxbir”ning “Kun.uz”ga aloqasi yo‘q. Ma’lum bo‘lishicha, Kattaqo‘rg‘on tumanida yashovchi, mahalliy bosma nashrlardan birida ishlovchi jurnalist Sh.Q. o‘zini “Kun.uz” muxbiri deb tanishtirib, tumandagi bog‘chalardan birining mudirasidan 3000 dollar pul talab qilgan (u avval ham tovlamachilikda ayblanib, 3 yil “o‘tirib” chiqqan). Voqea oktabrda bo‘lgan, hozirda tergov-surishtiruv ishlari olib borilmoqda.
“O‘zstandart” Red Bull energetik ichimligiga sertifikat berishni rad etdi. Nega birdan? Ichimlik yorlig‘idagi ma’lumotlar davlat tilida (ya’ni, o‘zbek tilida) mavjud bo‘lmaganligi sababli mahsulotga muvofiqlik sertifikati rasmiylashtirish rad etilgan. Bu ichimlikni O‘zbekistonga Mirolim Mirahmatov rahbarligidagi New Optimal kompaniyasi import qilarkan — bozor o‘zbekcha yorlig‘i yo‘q mahsulotlarga to‘lib yotgan bir vaqtda aynan Red Bull’ga “tashlanib qolishgani” g‘alati.
Xorijdagi o‘zbekistonliklar haqida. Qozog‘istonning salkam ikki yil avval 52 o‘zbekistonlik yonib ketgan viloyatida bu safar 55 nafar o‘zbekistonlikni olib ketayotgan avtobus qahraton yo‘l o‘rtasida buzilib qoldi — hamma qutqarilgan, o‘zbekistonliklar orasida tibbiy yordamga muhtojlar yo‘qligi aytilmoqda. Rossiyaning Voronejida esa fojia — 13-qavatdan tushgan g‘ishtlar bosib qolishi oqibatida o‘zbekistonlik ikki mehnat muhojiri halok bo‘lgan.
Dunyoda nima gap? Trampni mamlakat uchun “qiyosi yo‘q xavf” deb hisoblaydigan milliarder Maykl Blumberg AQSh prezidenti saylovida ishtirok etish uchun kerakli hujjatlarni Federal saylov komissiyasiga topshirdi — u o‘z vaqtida Nyu-York shahrini ancha yaxshi boshqargan. Rossiya prezidenti Vladimir Putin esa Severodvinskda halok bo‘lgan mutaxassislar “dunyoda muqobili yo‘q qurol” ustida ish olib borgani, Rossiya nima bo‘lishidan qat’iy nazar bu qurolni ishlab chiqishini ma’lum qildi. Isroil bosh prokurori esa mamlakat bosh vaziri Benyamin Netanyahuga nisbatan uchta jinoyat ishi bo‘yicha ayblov e’lon qilish niyatida ekanini bildirdi — ular orasida poraxo‘rlik bo‘yicha ish ham bor.
Izoh (0)