Италияда уй ҳайвонларининг ҳуқуқлари болалар ҳуқуқлари билан тенглаштирилиши мумкин

Италияда уй ҳайвонларининг ҳуқуқларини ошириш бўйича қонун лойиҳаси кўриб чиқилиши мумкин. Бу ҳақда Италиянинг Giornale агентлиги хабар берган.

Ҳужжатга кўра уй ҳайвонларининг мақоми ҳиссиётларга эга мавжудотларга тенглашади, итлар ва мушуклар эса буюм эмас тирик жонивор эканлиги инобатга олинади. Агентликнинг ёзишича, агар қонун тасдиқланса, уй ҳайвонларининг ҳуқуқлари болалар ҳуқуқлари билан тенглашади.Норма Италия фуқаролик кодексига киритилса, уй ҳайвони эгаси жониворнинг муносиб ҳаёт кечириши учун шароит яратиб бериш мажбуриятини ўз зиммасига олади. Шу тариқа эр-хотин ажрашадиган бўлса, уй ҳайвонининг ким билан қолиши масаласи ҳам суд қарорига мувофиқ ҳал этилади. Итлар оиланинг бошқа аъзолари билан черков ва бошқа жамоат жойларига бориши мумкин, нафақага чиққан полициячи-итлар эса ўрнатилган тартиб бўйича пенсия пули олади. Шунингдек, қонун лойиҳасида уй ҳайвонининг ўз эгасидан узоқлашиши масаласига ҳам ойдинлик киритилган: ҳайвоннинг эгаси вафот этса, у марҳумнинг қариндошлари ихтиёрида қолдирилади.Италияда уй ҳайвонларига нисбатан ёмон муносабатда бўлган фуқароларга катта миқдордаги жарима ва бошқа кескин маъмурий жазо чоралари кўрилади. Ҳукумат итларни жамоат транспортига олиб чиқиш бўйича имтиёзлар жорий этмоқда, мамлакатда ҳайвонлар учун меҳмонхона ва итлар учун пляжлар қурилмоқда.