АҚШ миллий хавфсизлик кенгаши подполковниги Александр Виндманга Украина мудофаа вазири бўлиш таклиф қилинган. Бу ҳақда ҳарбийнинг ўзи АҚШ вакиллари палатаси эшитувлари вақтида маълум қилган, дея хабар берди Axios.
Виндманнинг сўзларига кўра, Украина миллий хавфсизлик кенгаши собиқ котиби Александр Данукюк 2019 йилнинг ўзида унга уч марта мудофаа вазири лавозимини эгаллашни таклиф қилган. Подполковник ҳар сафар ушбу таклифларни рад этган ва ўз раҳбариятини бу ҳақда хабардор қилган.
«Бу кулгили ҳолат. АҚШ армияси подполковниги учун бундай юқори мартабали лавозимнинг таклиф этилиши ғаройиб ҳодиса. Данилюкнинг таклифи жиддий бўлганлигига шубҳам бор», — дейди Виндман.
Украина Миллий хавфсизлик кенгаши собиқ котиби Александр Данилюк ушбу хабарга муносабат билдириб, АҚШ подполковнигига ушбу таклифни ҳазил тариқасида айтганлигини маълум қилди.
Собиқ амалдорнинг айтишича, у Виндман билан ушбу мавзуни муҳокама қилган вақтда суҳбат ҳазил оҳангида кечган.
«Бу шунчаки ҳазил таклиф бўлганига шубҳа йўқ», — дейди Данилюк.
У АҚШ ҳарбийсига ушбу лавозимни расман таклиф қилиши учун Украина президенти Владимир Зеленскийдан тегишли тартибда рухсат олиши лозим бўлганлигига урғу берган.
Виндман – миллати украин бўлган америка фуқароси: унинг оиласи АҚШга болалигида кўчиб келган. Подполковник рус ва украин тилларида эркин сўзлай олади. Ҳарбий Данилюкнинг ушбу таклифни инглиз тилида билдирганини қайд этган.
АҚШ миллий хавфсизлик кенгашида Виндман Украина масалалари бўйича етакчи экспертлардан бири ҳисобланади. Ҳарбий зобит вакиллар палатаси эшитуви вақтида Украинага кўрсатилган ҳарбий ёрдам АҚШ президенти Дональд Трампнинг украиналик ҳамкасби Владимир Зеленскийга нисбатан босим ўтказишида бирламчи омиллардан бири бўлган.
29 августда Трамп Украинага ҳарбий ёрдам беришни қайта кўриб чиқишга қарор қилган. Текширув вақтида барча маблағлар музлатиб қўйилганди.
Кейинчалик Вашингтон Киевга яна ҳарбий ёрдам кўрсатишни бошлади. Сентябрда Дональд Трамп ва Украина президенти Владимир Зеленский ўртасидаги телефон сўзлашуви стенограммаси ошкор бўлиши вазиятни чигаллаштириб юборди. АҚШ Конгресси Зеленский билан суҳбат сабаб Трампга импичмент билан таҳдид қила бошлади. 23 сентябрда АҚШ Вакиллик палатасининг разведка ишлари бўйича қўмитаси раиси Адам Шифф президент Дональд Трампнинг Украина етакчисига ўтказган босими исботлангудек бўлса, импичмент ягона чора бўлишини маълум қилди. Владимир Зеленскийнинг суҳбат матнининг украин тилида чоп қилинишига қарши чиқиши Трампнинг муаммоларини баттар кўпайтирди. АҚШ президентининг мухолифати Трампни Зеленский билан суҳбат вақтида уни собиқ вице-президент Жозеф Байденнинг ўғлига нисбатан Украинада тергов ишлари ўтказишга мажбурлаб украиналик ҳамкасбига босим ўтказганликда айбламоқда.
Изоҳ (0)