Яман исёнчи хусийлари 18 ноябрь куни гаровга олган учта кемани қўйиб юборди. Бу ҳақда Жанубий Корея ТИВ маълум қилган. Кемалардан бирининг бортида 16 нафар денгизчи, жумладан, икки нафар Жанубий Корея фуқароси ҳам бўлган, деб ёзмоқда «Коммерсантъ».
Барча денгизчилар асирга олинганидан 45 соат ўтгач озод қилинган. Улар талафот кўрмаган ва ҳозир хавфсиз ҳудудда, дейилади Жанубий Корея ТИВ ахборотида.
Денгиз транспортлари асирга тушганидан кейин Ямандаги Салиф портига олиб кетилган. Саудия Арабистони бошқарувидаги коалиция хусийларнинг Жанубий Корея бурғулаш мосламасини тортувчи кемани эгаллаб олганини маълум қилган.
Saudi Aramco нефть заводларига ҳужум ҳақида
Сентябрда Саудия Арабистонидаги Saudi Aramco нефть заводларига ҳужум уюштирилиши натижасида мамлакатда нефтни ишлаб чиқариш икки бараварга қисқарган. Дронлар ҳужуми бўйича масъулиятни Ямандаги хусий жангарилари ўз зиммасига олган, кейинроқ АҚШ ҳамда Саудия Арабистони ушбу ҳужумлар ортида Эрон турганини билдирган.
11 октябрда Қизил денгизда Саудия Арабистонининг Жидда портига яқин ҳудудда Эрон нефть танкерига ҳужум уюштирилган ва кемадаги нефтнинг муайян миқдори сувга оққан. Теҳрон ушбу ҳужум ортида АҚШ, Исроил ва Саудия Арабистони турганини билдирган.
Изоҳ (0)