Эрондаги норозилик намойишларида ҳалок бўлганларнинг сони 100 нафардан ошди
Эронда бензин нархининг кескин оширилиши сабаб бошланган ва мамлакатнинг 21 та шаҳарида давом этаётган норозилик намойишларида қурбон бўлганларнинг сони 106 нафарга етди. Бу ҳақда Amnesty International хабар берган.
Эрон ҳукумати 19 ноябрда мингдан ортиқ одамнинг ҳибсга олингани ва вазият устидан назорат ўрнатилганлигини маълум қилган.
Amnesty International маълумотига кўра, намойишлар оқибатида ҳалок бўлганлар сони 106 нафардан кўп бўлиши ҳам мумкин, қурбонларнинг камида 200 нафар эканлиги ҳақида ҳам хабарлар тарқалган. Эрон маҳаллий ОАВ маълумотига кўра эса норозиликлар оқибатида ҳалок бўлганлар сони у қадар кўп эмас, намойишларни бостириш вақтида 4 нафар хавфсизлик ходими ҳалок бўлган.
Эрон бутун дунёда бензин нархи энг паст бўлган мамлакатлардан бири. Эронда 15 ноябрь куни бензин нархини уч баравар, яъни 1 литр учун 30 минг риалгача (0,2 АҚШ доллари) миқдорида ошириш ҳақидаги фармойиш эълон қилинган. Эронда аҳолининг норозилик намойишлари 16 ноябрда ҳукуматнинг бензин нархини ошириш ҳақидаги қарорни имзолагани оқибатида бошланган. Эрон полицияси намойишчиларни тарқатиш учун уларга нисбатан ўқотар қуролдан фойдаланган. Норозиликлар туфайли 16 ноябрь куни Эронда Интернет ўчириб қўйилди. Вашингтон Эрон ҳукуматининг мамлакатда бошланган норозиликлар туфайли Интернетни ўчириб қўйгани учун кескин қоралади ва намойишчилар томонида эканлигини маълум қилди. Эрон бензин нархи ошгани туфайли моддий зарар кўрган аҳолига кўрилган зарарни қоплаш учун субсидиялар ажратган. Эрон олий етакчиси Али Хоманаий мамлакатда бензин нархининг ошиши сабаб бошланган халқ норозиликларини хориждаги душманларнинг фитнаси деб атаган.
Изоҳ (0)