«Дарё» нашри орқали 15 миллиард сўмлик мулкларидан айрилган самарқандлик тадбиркор Жамшид Шомуродовнинг мурожаатлари фақат хат билан ёпилаётганлиги тўғрисида мақола эълон қилинган эди. Мазкур мақолада келтирилган важлар бўйича Next City («Гарант Қурувчи Сервис») МЧЖ ўз муносабатини билдирди.
– Фуқаро Жамшид Шомуродов ўзининг муаммолари бўйича мутлақо нотўғри ва асоссиз маълумотлар берган, — дейди Next City МЧЖ раҳбари Элдор Мўминов. – Хусусан, Самарқанд шаҳар Гагарин кўчаси 128-манзилда жойлашган 5 қаватли ётоқхона биноси 25 йилдан ортиқ вақт давомида Самарқанд обрўсига путур етказиб келаётган эди. Ушбу манзилда енгил табиатли аёллар билан курашиш, «СамСузаниПлюс» (собиқ «Сапфир») тиббий клиникаси жиноятлари билан курашишдан чарчаган халқнинг аҳволи ҳеч кимга сир эмас.
Самарқанд шаҳар ИИБ 2014 йил 3 октябрда Самарқанд шаҳар ҳокимига расман мурожаат йўллаб, Гагарин кўчаси 128-манзилдаги 5 қаватли ётоқхонада фоҳишалар кўпайиб кетганлиги сабабли бирор бир чора кўришини сўраган. Шундан сўнг Самарқанд вилояти архитектураси сўровномасига жавобан 2015 йил 22 июлда «ТошбошпланЛИTИ» ДУК мазкур ётоқхона авария ҳолатда эканлигини инобатга олган ҳолда ушбу бинонинг ўрнида замонавий кўп қаватли уй қурилиши жойлашувини кўриб чиқиш учун Самарқанд вилояти архитектура ва шаҳарсозлик Кенгашининг йиғилиши муҳокамасига қўйилган. 2015 йилнинг 31 декабрь куни 02/3-710 рақам билан қайд этилган 10-баёнида таклиф маъқулланган.
– Тегишли барча давлат инстанциялари билан келишилган ҳолда 2015 йилнинг 27 ноябрда Самарқанд шаҳар ҳокими А.Шукуровнинг №1602-К сонли қарорига асосан «Гарант Қурувчи Сервис» МЧЖга Гагарин кўчаси 128-манзилдаги ётоқхона биносини бузилиши ҳисобидан кўп қаватли уй қуришга рухсат берилди, — дейди Next City МЧЖ раҳбари Элдор Мўминов. – Сўнг 2016 йилнинг 19 декабрида Самарқанд шаҳар ҳокимининг №1858-К сонли қарори билан тегишли ўзгартириш ва қўшимча киритиш тўғрисида, яъни «Гарант Қурувчи Сервис» МЧЖга Самарқанд шаҳар Фитрат кўчаси 1-йўлак 1, 3, 5 ва 7-хонадонлар ҳамда Гагарин кўчаси 128 ва 130-манзилдаги уйларни бузилиши ҳисобидан кўп қаватли турар-жой бинолари қурилишига рухсат берилди.
Маълум бўлишича, Гагарин кўчаси 128-манзилдаги ётоқхона биносида ўндан ортиқ нотурар ва 76 дан зиёд турар хонадонлардан иборат бўлган. Мазкур кўп қаватдаги барча хонадон эгаларидан ҳеч қандай суд ёки бошқа инстанцияларсиз розиликлар олинган. Фақат «СамСузаниПлюс» тиббиёт клиникаси мулкдорлари Ж.Шомуродов ва Ф.Шомуродоваларга тегишли бўлган нотурар жой ва Ж.Шомуродовга тегишли турар жой хонадонлари билан бўлган келишув қийин кечган. Шу сабали Самарқанд шаҳар ҳокимлигининг даъвосига кўра 2017 йилнинг 13 октябрь куни Фуқаролик ишлари бўйича Самарқанд шаҳар суди ҳал қилув қарори ва 2017 йилнинг 21 декабрь куни ФИБ Самарқанд вилояти суди апелляция инстанциясининг ажримларига асосан нотурар жой учун товон тариқасидаги пул тўлови тўланган. Шунингдек, турар жой учун қуриладиган кўп қаватли уйнинг ўзидан жой ажратилган. Қолаверса, 2019 йил 5 февралда Олий суд томонидан иш назорат тартибида қайта кўриб чиқилиб, ФИБ Самарқанд вилояти суди апелляция инстанциясининг ажримларида Самарқанд шаҳар ҳокимининг қарорларини ҳақиқий деб топган.
– Қурилишга қарор қабул қилингандан кейин ушбу хонадон эгалари билан гаплашиш ва розилигини олиш мақсадида Самарқанд шаҳар ҳокимлиги комиссияси тузилган эди. Ушбу комиссия бузилишга тушган ётоқхона биноси хонадон эгалари билан муроса қилиш мақсадида жойига чиқиб, Самарқанд шаҳар ҳокими қарорининг мазмун-моҳияти хонадон эгаларига тушунтирилиб берилди, — дейди Next City МЧЖ раҳбари Элдор Мўминов. – Ўша вақтда «СамСузаниПлюс» тиббиёт клиникаси асл эгаси марҳума Сайдалиева билан учрашиб у кишининг ўзига ҳам қарор мазмуни тушунтирилган. Аммо марҳума Сайдалиева комиссия аъзоларини беписанд қилиб, ҳокимият комиссиясини «ҳайдаган» эди.
Қурилиш ташкилоти томонидан Гагарин кўчаси 128-манзилдаги барча хонадон эгаларининг розиликлари олинган. Бироқ қурувчилар билан келишувни хоҳламаган тиббиёт клиникаси эгасининг розилигини олиш, у билан келишиш мақсадида Самарқанд шаҳар ҳокимлиги комиссияси тузилган. Комиссия аъзоларини тиббиёт клиникаси бош врачи Наргиз Санаханова қабул қилиб Самарқанд шаҳар ҳокимининг қурилиш бўйича ўринбосари раислигидаги комиссиясига ҳокимнинг қарорини тан олмаслигини билдирган.
– 2016 йил марҳума Сайдалиева рози қилса қаршилиги йўқлигини, ҳозирда саломатлиги яхши эмаслиги сабабли қизи Наргиз Санаханова орқали гаплашишини билдирган. Санаханова кейинчалик тергов томонидан қалбаки деб топилган Жамшид Шомуродовдан берилган ишончнома орқали қурилиш корхонаси вакиллари билан музокара олиб боришни бошлаган, — дейди Next City МЧЖ раҳбари Элдор Мўминов. – Қурувчилар томонидан Самарқанд шаҳар ИИБ биноси орқасида жойлашган янги қурилган бинони сотиб олиб бериш таклиф қилинган. Аввалига Наргиз Санаханова рози бўлиб, ҳатто етмай қолган қисми учун расмий хат асосида ҳисоб рақамига 70 миллион сўм ўтказиб берилган. Кейинчалик марҳума Сайдалиеванинг фикри ўзгариб, Буюк ипак йўли кўчаси 112-Л манзилдаги собиқ «Маржона» ресторани жойлашган бинони сотиб олиб беришни сўраган.
Наргиз Санаханова қурувчилар томонидан собиқ «Маржона» ресторани биноси сотиб олиниб, таъмирлаш ишлари тўлиқ тугатилгандан сўнг ҳужжатларни расмийлаштириб, клиникани бузиш учун бўшатиб беришини айтган. Аммо Самарқанд шаҳар ИИБ томонидан шаҳардаги 2-сонли туғуруқхонадаги чақалоқларни куйдириш бўйича «СамСузаниПлюс» тиббиёт клиникаси мулкдорлари бош врачи Наргиз Санаханова жиноятчиликда айбланиб қўлга олинган.
– Орадан бироз вақт ўтиб клиниканинг асл эгаси Сайдалиева вафот этади. Қурувчилар Жамшид Шомуродовга учраб, бўлган воқеаларни тушунтиради. У эса бузилишга қарши эмаслигини билдиради. Аммо онаси марҳума Сайдалиева ва синглиси Наргиз Санаханова маъқуллаган Буюк ипак йўли 112-Л манзилдаги бино унга маъқул эмаслигини айтди, — дейди Next City МЧЖ раҳбари Элдор Мўминов. – Жамшид Шомуродовга янги қуриладиган бинонинг ўз ўрнидан, фақат шимолий бурчакдан эмас, балки жанубий бурчакдан жой бериш таклифи берилди. Лекин Шомуродов фақат ўз ўрнини берасиз деб бу таклифга ҳам кўнмади. 2017 йилнинг 3 июль куни таклиф ҳақидаги маълумот ҳатто Жамшид Шомуродовнинг қўл телефонига ҳамда Telegram мессенжерига юборилган.
Жамшид Шомуродов Фуқаролик ишлари бўйича Самарқанд шаҳар судига мурожаат қилган. Суд давомида қурилиш корхонаси томонидан келишиш мақсадида яна бир неча таклифлар берилган. Хусусан, Буюк ипак йўли 112-Л манзилдаги бузилишга тушган бино ўрнидан қуриладиган кўп қаватли уйдан жой ҳамда пул тариқасидаги таклифлар киритилган. Аммо келишиш имконияти бўлмаган.
2017 йил 13 октябрь куни Фуқаролик ишлари бўйича Самарқанд шаҳар суди ҳал қилув қарори ва 2017 йилнинг 21 декабрь куни ФИБ Самарқанд вилояти суди апелляция инстанциясининг ажримлари чиққан. Ушбу ажримда нотурар жой учун пул тўлови ва турар жой учун қурилаётган кўп қаватли уй-жойнинг ўзидан мутаносиб уй-жой ажратилиши кўрсатилган.
– Жамшид Шомурадов синглиси Наргиз Санаханованинг терговлари олиб борилиши муносабати билан ушбу хонадонларнинг жиноятга алоқадорлиги ва қалбакилаштирилган хонадон ҳужжатлари бор-йўқлиги аниқлангунга қадар Самарқанд шаҳар ИИБ Тергов бўлими томонидан пул вақтинча Самарқанд вилояти ИИБ ҳисоб рақамига олинган. Кейинчалик ушбу товон пули Самарқанд шаҳар МИБга ўтказиб берилган. Санаханова эса Жиноят кодексининг 97-моддаси билан айбланган, — дейди Next City МЧЖ раҳбари Элдор Мўминов. – Самарқанд вилояти ҳокими тадбиркорлар муаммоларини ҳал этиш юзасидан жорий йилнинг 14 июнь кунги қабулида Жамшид Шомуродовнинг аризалари сабабли авария ҳолатига етиб қолган Гагарин кўчаси 128-ётоқхона биносини бориб кўрган. Самарқанд вилояти ҳокими бошчилигида тегишли ташкилот раҳбарлари иштирокида қурилиётган кўп қаватли уй ўрганилиб, Next City МЧЖга лойиҳа асосида режалаштирилган кўп қаватли уйни қуриш ишларини давом эттиришга рухсат берилган.
Изоҳ (0)