Сўнгги кунларда ижтимоий тармоқларда, хусусан Telegram’даги каналларда ишлаб чиқарилган манзили аниқ бўлмаган кекс ёки шунга ўхшаш пишириқлар ичидан номаълум таркибли таблеткалар чиқаётганлиги, уни истеъмол қилганларда фалажлик ҳолатлари келиб чиқаётганлиги тўғрисида видеохабарлар тарқалди. Ўзбекистон Соғлиқни сақлаш вазирлиги мазкур видеога муносабат билдирди.
Вазирлик томонидан маълум қилинишича, Ўзбекистонда ишлаб чиқарилган ёки хориждан республика ҳудудига олиб кириладиган ҳар қандай турдаги озиқ-овқат маҳсулоти, жумладан, кекс ва шунга ўхшаш ширин пишириқларнинг хавфсизлигини кафолатлаш учун маҳсулот олиб келган тадбиркор мурожаатига асосан санитария шифокори жойига чиқиб, маҳсулот сифати, уни сақлаш шароити, олиб келинган автотранспорт ҳолатини тўлиқ ўрганади.
Бунда маҳсулотдан санитария-кимёвий, микробиологик, радиологик текширувлар учун намуналар олиниб, тегишли лабораторияларга топширилади. Таҳлил натижалари амалдаги санитария меъёр ва қоидаларга тўлиқ жавоб берган тақдирда, санитария-эпидемиологик хулоса расмийлаштирилиб, маҳсулотнинг хавфсизлигини кафолатланади.
Таъкидланишича, 2019 йил 15 ноябрь ҳолатига Соғлиқни сақлаш вазирлиги тасарруфидаги шифохоналарга юқоридаги каби маҳсулотлар билан заҳарланиш ёки касаллик аломатлари билан аҳоли томонидан ҳеч қандай мурожаат бўлмаган. Бу ҳақда Санитария-эпидемиологик осойишталик агентлиги ва унинг ҳудудий марказларига ҳам маълумотлар келиб тушмаган.
Вазирлик аҳолидан бундай асосланмаган хабарларга ишониб, саросимага тушмасликни, бу каби ҳолатлардан хабардор бўлган тақдирда, зудлик билан ҳудудий Санитария-эпидемиологик осойишталик марказларига ҳамда +998712765928 ишонч телефони орқали Соғлиқни сақлаш вазирлиги ҳузуридаги Санитария-эпидемиологик осойишталик агентлигига мурожаат қилишни сўраган.
Изоҳ (0)