«Фарғона вилоятига – китоб карвони» ёзувли автомашинанинг юкхонасига картошка ортилгани акс этган ижтимоий тармоқларда тарқалган фотосурат юзасидан Фарғона вилояти ахборот ва оммавий коммуникациялар бошқармаси ойдинлик киритди.
Бошқарма хабарида айтилишича, ҳолат бошқармаси масъуллари иштирокида ўрганилди. Улар юк автомашинаси эгасини топиб, ўзидан холис муносабат сўраган.
Унинг айтишича, «китоблар йилнинг май ойи охирида шу машинада олиб келинган, лекин сурат ноябрь ойи бошларида олинган бўлиши керак». «Нега беш ойча вақт машина бортида ёзув қолдирилган?» деган саволга автомашинаси эгаси қуйидагича изоҳ берган:
«Июнь—октябрь ойларида машинамиз бузилганича ноябрда тузалди. Эҳтиёт қисмларни тўплаш чўзилиб кетди. Катта рўзғоримизни тебратиб турган машина тузалгач, ишга чиқиш олдидан Фарғона шаҳар марказига яқин жойдаги юк машиналарини ювиш ва тозалаш жойига олиб бордим. Ўша жойга яқин ҳудудда бир ҳамкасб танишимни учратдим ва мендан ёрдам сўради. Юки билан машинаси бузилган экан. Унинг илтимосига кўра, қопланган картошкаларни вақтинчаликка менинг машинамга юклаб турдик. Буни ҳайдовчилар тилида «перекид» дейишади. 1—2 соатга, холос. Шу куниёқ танишим машинасини таъмирлаб қайтди, яна картошкалар ўз жойига қайта юкланди. Бу орада машинам автотураргоҳдан ҳеч қаёққа чиқмаган. Қолаверса, у жой бозор ҳудуди ҳам эмас».
Унинг айтишича, ўша куннинг ўзида таъмирдан чиққан машинасини яхшилаб тозалатиб, ёзувларни ҳам олиб ташлаган.
Изоҳ (0)