14 ноябрь куни Тошкент шаҳрида Марказий Осиё минтақавий иқтисодий ҳамкорлик (МОМИҲ) дастурининг 18-вазирлар конференциясининг очилиши бўлиб ўтди. Бу ҳақда Инвестициялар ва ташқи савдо вазирлиги матбуот хизмати «Дарё»га хабар берди.
Маросимнинг тантанали очилишида Ўзбекистон Ҳукумати аъзолари, Осиё тараққиёт банки (ОТБ) президенти Такеҳико Накао, иқтисодиёт, инвестициялар ва савдо соҳаларида 11 мамлакатнинг юқори мартабали вакиллари,халқаро молия институтлари, халқаро ҳамкорлик ташкилотлари вакиллари ва дипломатик ваколатхоналар раҳбарлари иштирок этди.
Конференция мавзуси «Янги МИМИҲ – минтақавий ҳамкорлик доирасини кенгайтириш».
Ушбу тадбир конференция иштирокчиларига Ўзбекистон Президентининг табрик мурожаатини етказиш билан очилди. Мурожаатда Осиё тараққиёт банки раҳбариятига ва барча иштирокчиларга тадбирни ташкил этишдаги биргаликда харакатлар учун алоҳида миннатдорчилик билдирилиб, кун тартибига киритилган масалаларни муҳокама қилиш ва келишиш ишларида самарали фаолият тилаб ўтилди.
ОТБ Президенти Такеҳико Накао МОМИҲ Дастури конференцияси ташкилотчиси ва ташаббускори номидан қилган чиқишида Ўзбекистон томонидан тадбирни юқори даражада ташкил қилинганини таъкидлаб ўтиб, Ўзбекистон Президенти ва Ҳукуматига ўз миннатдорчилигини билдирди.
Шунингдек, у ўз маърузасида Осиё тараққиёт банкининг минтақадаги стратегик ҳамкорлари қаторида бўлган Ўзбекистоннинг иқтисодий ўзгариш жараёнларига юқори баҳо бериб, амалга оширилаётган ислоҳотлар натижасида мамлакатда юзага келган қулай шароит доирасида икки томонлама ўзаро муносабатларни янада кенгайтирилишига умид билдирди.
«Биз, Ўзбекистон ва МОМИҲ иштирокчи давлатларнинг иқтисодий фаровонлик даврига ўтиш билан боғлиқ бўлган, ўзаро ишонч ва ҳамкорликни мастаҳкамлашга тарафдорлик тамойиллари асосида шаклланаётган биргаликдаги ҳаракатларни олқишлаймиз», — деб таъкидлади Такеҳико Накао.
Конференцияга раислик қилувчи – Ўзбекистон Инвестициялар ва ташқи савдо вазири Сардор Умурзоқов МОМИҲ Дастурининг минтақавий ташаббусларни амалга ошириш билан боғлиқ долзарб масалаларни ҳар томонлома муҳокама қилиш ҳамда инвестиция, энергетика, транспорт ва савдо соҳаларида ўзаро муносабатларни ривожлантириш ва мустаҳкамлаш учун аъзо мамлакатларнинг биргаликдаги ҳаракатлар стратегиясини шакллантириш учун платформаси сифатида муҳим ролини таъкидлаб ўтди.
Шунингдек пресс-конференция давомида аъзо мамлакатлар ва халқаро ҳамкорлар томонидан МОМИҲ Дастури чора-тадбирларини амалга оширишда эришилган натижалар, шу жумладан энергетика ва транспорт соҳасида ишлаб чиқилган стратегияларни кўриб чиқишга бағишланган панел сессиялари ўтказилади ҳамда барқарор ривожланишнинг қатор устувор йўналишлари бўйича минтақавий ҳамкорликнинг долзарб масалалари муҳокама қилинади.
Изоҳ (0)