Туркия элчиси Помпеонинг АҚШнинг урушга тайёргарлиги ҳақидаги гапларига муносабат билдирди

Туркиянинг Ўзбекистондаги фавқулодда ва мухтор элчиси Меҳмет Сурейя Эр АҚШ давлат котиби Майк Помпеонинг Вашингтоннинг Анқара билан урушга тайёрлиги ҳақида билдирган баёноти хато айтилган сўзлар эканлигини билдирди.

Мен буни инсон фактори сабаб юз берган хато деб ҳисоблайман. Таржимада йўл қўйилган одатий хатолардан бири. Юқори мартабали давлат амалдори бундай масъулиятсиз баёнот беришига ишонмайман. Биз дипломатлар учун оғзаки гап-сўзлардан ёзма протокол ёзишмалари муҳимроқ.

Меҳмет Сурейя Эр, элчи

22 октябрь куни АҚШ давлат котиби Майк Помпео CNBC телеканалида мамлакат президенти Дональд Трампнинг зарурат пайдо бўлса Туркия билан урушга тайёрлигини, лекин Вашингтоннинг урушдан кўра тинчликни афзал билишини қайд этганди.

9 октябрда Туркия президенти Ражаб Тоййиб Эрдўғон Сурия шимоли-шарқида «Сурия демократик кучлари», Курдистон ишчи партияси жангарилари ҳамда ИШИД террорчиларига қарши «Тинчлик булоғи» операциясини бошлаган. АҚШ ушбу ҳарбий ҳаракатларни қоралаган ва операция бошланганидан кейин уларда иштирок этмаслиги, Сурия ҳудудидаги қўшинини олиб чиқиб кетишини маълум қилган.

17 октябрда Туркия президенти Ражаб Тоййиб Эрдўғон ҳамда АҚШ вице-президенти Майк Пенс ўртасидаги музокаралардан кейин Анқара Суриядаги ҳарбий операцияни тўхтатган ва курдларнинг чегара ҳудудидан узоқлашиши учун 120 соат давомида ўт очмаслик шартига рози бўлган.22 октябрда Россия президенти Владимир Путин ва Туркия давлат раҳбари Ражаб Тоййиб Эрдўғон ўртасида олти ярим соат давомида Сурия шимоли-шарқидаги вазият ўзаро муҳокама қилинди ва чегара ҳудудида рус-турк қўшма патрул тадбирларини ўтказиш тўғрисида меморандум имзоланди. Унга кўра, «Тинчлик булоғи» операциясида яна 150 соатлик танаффус эълон қилинган.Ушбу вақт поёнига етгач, Россия ҳарбий полицияси ва Туркия қўшини Сурия чегарасида патрул тадбирлари ўтказади. Икки давлат қочоқлар учун «хавфсиз зона» ташкил этишда ҳамкорлик ҳамда Адана халқаро шартномаси шартларига амал қилишни ҳам келишиб олган.