Афғонистонда 1TV телеканали орқали ташқи ишлар вазири Салоҳуддин Раббонийнинг мамлакат президенти Муҳаммад Ашраф Ғанидан ўзини истеъфога чиқаришини сўраб мурожаат йўллангани хабар қилинди, деб ёзмоқда «ТАСС».

Раббонийнинг сўзларига кўра унинг бошқарувидаги вазирлик ўз йўналишидан ортга чекинган ва давлат ҳукуматига бўйсунувчи нодавлат ташкилотига айланиб қолган.

Шунингдек, Афғонистон ТИВ раҳбари мамлакатда ислоҳотлар баҳонасида амалга оширилаётган муносабатлар якунда умумий бирдамликка зарар келтириши мумкинлигини қайд этди.

Аввал Афғонистон ташқи ишлар вазирлиги матбуот котиби Сибгатулло Аҳмадийни «Толибон» ҳаракати делегациясининг Покистонга ташрифи ҳақида фикр билдиргани учун президент Муҳаммад Ашраф Ғани томонидан ишдан ҳайдалган, кейинчалик ҳукумат раҳбари Абдулла Абдулла уни ўз иш жойига қайтарганди.