«Яллама» пости орқали жисмоний шахслар ва айрим турдаги транспорт воситаларининг ҳаракати вақтинча чекланади

Давлат божхона қўмитаси ташқи иқтисодий фаолият иштирокчилари, ташувчилар ва жисмоний шахсларга мурожаат йўллади.

Қайд этилишича, Қозоғистоннинг Ўзбекистон билан чегарада жойлашган ‘Б.Конисбаев’ чегара ўтказиш пунктида қайта қуриш ва кенгайтириш ишлари олиб борилиши муносабати билан, 2019 йилнинг 1 ноябридан бошлаб мазкур чегара ўтказиш пунктида пиёда равишда ҳаракатланаётган жисмоний шахслар, енгил автотранспорт ва 3,5 тоннагача юк кўтариш қобилиятига эга бўлган юк автотранспорт воситаларининг ҳаракати 2020 йилнинг биринчи ярмига қадар тўхтатилади.

«Шу муносабат билан давлат божхона қўмитаси товар ҳамда транспорт воситаларини божхона чегараси орқали олиб ўтувчи ташқи иқтисодий фаолият иштирокчилари, ташувчилар, енгил автотранспорт воситалари ҳайдовчилари ва пиёда равишда ҳаракатланувчи жисмоний шахсларга вақтларини тежаш, сарф-харажатларнинг олдини олиш мақсадида ўзбек—қозоқ чегарасида жойлашган бошқа муқобил ўтказиш пунктлари орқали ҳаракатланишлари мумкинлигини маълум қилади», — дейилади хабарда.

Қозоғистоннинг «Б.Конисбаев» чегара ўтказиш пункти Тошкент вилояти Чиноз туманидаги «Яллама» чегара ўтказиш пунктига туташ ҳисобланади.