Ўзбекистон ҳукумати Европа тикланиш ва тараққиёт банкининг (ЕТТБ) 7 миллион евро маблағини мамлакатдаги иккита собиқ уран конларини қайта тиклаш учун жалб қилишни режалаштирмоқда, деб хабар беради «Gazeta.uz».
2017 йил март ойида ЕТТБ ва Ўзбекистон ҳукумати мамлакатда Марказий Осиё учун экологик реабилитация ўтказиш бўйича битим имзолаган эди.
Ҳужжатда Ўзбекистоннинг Марказий Осиёда атроф-муҳитни тиклаш бўйича ЕТТБ фондининг уран объектларини қайта тиклаш дастурида иштирок этиши кўзда тутилган. Ўша йилнинг июнь ойида ушбу битим Ўзбекистон Президенти Шавкат Мирзиёев томонидан тасдиқланган.
Лойиҳа Тошкент вилоятидаги Янгиобод ҳамда Наманган вилоятидаги Чаркесар посёлкаларидаги собиқ уран конларини реабилитация қилиш ва қайта тиклашни назарда тутади.
Ушбу объектлар совет даврида ишлатилган ва ўтган асрнинг 90 йиллари бошида уранни очиқ усулда қазиб олиш норентабел деб топилиб, уларнинг фаолияти тўхтатилган.
Реабилитация лойиҳасининг техник хусусиятларини комплекс баҳолаш ва тайёрлаш Германиянинг WISUTEC компанияси томонидан амалга оширилди.
Қўмита вакили айни пайтда ЕТТБ билан келишувни амалга ошириш бўйича чора-тадбирларни назарда тутувчи Ўзбекистон Президентининг фармойиши лойиҳаси тайёрланганлигини маълум қилди.
Хусусан, лойиҳани ишга тушириш ва молиялаштиришни очиш учун Экология ва атроф-муҳитни муҳофаза қилиш давлат қўмитаси ҳузурида қурилиш дирекцияси ташкил этилди, фанлар академияси ядро физикаси институти грант олувчи этиб белгиланди.
Марказий Осиёда атроф-муҳитни тиклаш бўйича ЕТТБ жамғармаси 2015 йил май ойида Қирғизистон, Тожикистон ва Ўзбекистонда совет давридан қолган эски уран қазиб олиш ва уран қайта ишлаш объектларининг экологик муаммоларини ҳал қилиш учун ташкил этилган.
2018 йилда Европа комиссияси жамғармага 10 миллион евро ҳисса қўшди.
Изоҳ (0)