Футбол бўйича Португалия терма жамоаси Евро—2020 саралаши 8-туридан ўрин олган баҳсда Украинага ютқазиб қўйди (1:2). Португаллар сардори Криштиану Роналду мазкур баҳсда пенальтидан рақиб дарвозасини ишғол қилди.
Бу португалиялик футболчи учун фаолиятидаги 700-гол бўлди. Қуйида «Дарё» мазкур голларга оид статистика ва маълумотлар билан ўртоқлашади.
Роналду 700 та гол уриши учун 973 ўйин керак бўлди, шу ўйинларнинг 458 тасида у гол уришга эришган. Ҳар бир баҳсда ўртача — 0,72 гол.
Уларнинг 450 таси «Реал» (438 ўйинда) сафида киритилган бўлса, 118 таси «Манчестер Юнайтед» (292 ўйин) таркибида, 95 та терма жамоа (162 ўйин), 32 та «Ювентус» (51 ўйин) ва бештаси «Спортинг» клуби (31 ўйин) сафида урилган.
Криш 21 та турли хил мусобақаларда рақиблар дарвозасини ишғол қилишга эришган. Роналду Ла Лигада 311 гол урди, Чемпионлар Лигасида эса 127 ва АПЛда 84 голга муаллиф бўлди.
Криштиану барчадан кўпроқ ушбу жамоалар дарвозасини ишғол қилди: «Севилья» (27), «Атлетико» (25), «Хетафе» (23) ва «Барселона» (18).
У 444 голни ўнг оёғида, 126 — чапда, 128 та гол бош билан ва икки марта танасининг бошқа қисмлари орқали киритди.
34 ёшли футболчи биринчи голини 17 йил аввал — 2002 йилнинг октябрида урган эди. Ўшанда «Спортинг» клуби «Морейренсе»ни мағлубиятга учратган.
2011/12 йилги мавсумда Роналду 69 та гол уришга эришди ва бу унинг учун рекорд натижа ҳисобланади.
Роналду 700 голлик довонни забт этган тарихдаги олтинчи футболчига айланди. Энди у Герд Мюллер (701 та гол), Ференс Пушкаш (709), Ромарио (748), Пеле (779) ва Ёзеф Бицан (805) каби афсоналар қаторига қўшилди.
Яна бир қизиқарли факт! Роналду голларнинг 370 тасини оқ либосда урган. Шунингдек, 177 — қизил, 40 — қора, 27 — оқ-қора, 20 — кўк, 13 — яшил, 8 — кулранг, 5 — сабзиранг, 5 — бинафшаранг, 3 — оқ-яшил, 2 — қора-сариқ, 2 — тўқ кулранг ва битта қирмизи ранг.
Нодирхон Ҳамидхонов тайёрлади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)