Ronaldu faoliyatidagi 700-golni urdi. To‘liq statistika va fotofaktlar

Futbol bo‘yicha Portugaliya terma jamoasi Yevro—2020 saralashi 8-turidan o‘rin olgan bahsda Ukrainaga yutqazib qo‘ydi (1:2). Portugallar sardori Krishtianu Ronaldu mazkur bahsda penaltidan raqib darvozasini ishg‘ol qildi.

Bu portugaliyalik futbolchi uchun faoliyatidagi 700-gol bo‘ldi. Quyida “Daryo” mazkur gollarga oid statistika va ma’lumotlar bilan o‘rtoqlashadi.

Ronaldu 700 ta gol urishi uchun 973 o‘yin kerak bo‘ldi, shu o‘yinlarning 458 tasida u gol urishga erishgan. Har bir bahsda o‘rtacha — 0,72 gol.

Ularning 450 tasi “Real” (438 o‘yinda) safida kiritilgan bo‘lsa, 118 tasi “Manchester Yunayted” (292 o‘yin) tarkibida, 95 ta terma jamoa (162 o‘yin), 32 ta “Yuventus” (51 o‘yin) va beshtasi “Sporting” klubi (31 o‘yin) safida urilgan.

Krish 21 ta turli xil musobaqalarda raqiblar darvozasini ishg‘ol qilishga erishgan. Ronaldu La Ligada 311 gol urdi, Chempionlar Ligasida esa 127 va APLda 84 golga muallif bo‘ldi.

Krishtianu barchadan ko‘proq ushbu jamoalar darvozasini ishg‘ol qildi: “Sevilya” (27), “Atletiko” (25), “Xetafe” (23) va “Barselona” (18).

U 444 golni o‘ng oyog‘ida, 126 — chapda, 128 ta gol bosh bilan va ikki marta tanasining boshqa qismlari orqali kiritdi.

34 yoshli futbolchi birinchi golini 17 yil avval — 2002-yilning oktabrida urgan edi. O‘shanda “Sporting” klubi “Moreyrense”ni mag‘lubiyatga uchratgan.

2011/12-yilgi mavsumda Ronaldu 69 ta gol urishga erishdi va bu uning uchun rekord natija hisoblanadi.

Ronaldu 700 gollik dovonni zabt etgan tarixdagi oltinchi futbolchiga aylandi. Endi u Gerd Myuller (701 ta gol), Ferens Pushkash (709), Romario (748), Pele (779) va Yozef Bitsan (805) kabi afsonalar qatoriga qo‘shildi.

Yana bir qiziqarli fakt! Ronaldu gollarning 370 tasini oq libosda urgan. Shuningdek, 177 — qizil, 40 — qora, 27 — oq-qora, 20 — ko‘k, 13 — yashil, 8 — kulrang, 5 — sabzirang, 5 — binafsharang, 3 — oq-yashil, 2 — qora-sariq, 2 — to‘q kulrang va bitta qirmizi rang.

Nodirxon Hamidxonov tayyorladi