ЖЧ—2022 иккинчи саралаш босқичи 4-тури доирасида кечадиган Сингапур — Ўзбекистон учрашувидан олдинги матбуот анжуманида Ўзбекистон терма жамоаси ёрдамчи мураббийи Темур Кападзе ва дарвозабон Абдумавлон Абдужалилов иштирок этди.
— Олдинги мураббий кетгач жамоа ўйинида нималар ўзгарди?
— Сингапур давлатига меҳмондўстлик учун раҳмат айтамиз. Саволга келадиган бўлсак футболчилар ҳужумкор ўйнашни истаганди, мураббий ўзгарганидан кейин анча ҳужумкор тактикада ўйнай бошладик. Биз айни пайтда ўзбекистонлик мухлислар ва мутахассислар хоҳлаган ўйинни намойиш этаяпмиз.
— Сингапур терма жамоаси ҳақида нима дея оласиз?
— Биз барча рақибни ҳурмат қиламиз. Сингапур ҳам шулар қаторида. Бўлажак рақибимиз сўнгги пайтларда яхши натижалар қайд этмоқда. Ўз ўйинимизни кўрсатишга яъни ҳужумкор тарзда ўйнашга интиламиз. Сингапур сафида ҳужумда тезкор футболчилар бор, бундан ташқари ақлли мураббийга эга.
— Эртага Ўзбекистон бутун ўйин давомида ташаббусга эгалик қилиб, ҳужумда ўйнайдими?
— Замонавий футболда бутун ўйин давомида ҳужумда ўйнаб бўлмайди, аммо имкон қадар кўпроқ ҳужумда ҳаракат қилишга интиламиз, — дейди Кападзе.
— Аввалги мураббий ва ҳозирги мураббий ўйин услубида қандай фарқ бор?
— Биз анча эркин ўйнашни бошладик. Купер вақтида мен терма жамоага чақирилмаганман. Абрамов билан «Бунёдкор»да ҳам бирга ишлайман. Уни яхши биламан ва кўпроқ урғуни ҳужумга қаратишни бошладик, — дейди Абдужалилов.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)