Тожикистон президенти Эмомали Раҳмон республика саноат корхоналари вакиллари билан йиғилишда Роғун ГЭСининг қурилишига қанча маблағ сарфланганини айтиб ўтди. Бу ҳақда «Sputnik» хабар берди.
Тожикистон президенти саноат корхоналари вакиллари билан ўтказилган йиғилишда мамлакатнинг улкан гидроэнергетика ресурсларига эга эканлигини алоҳида таъкидлаган.
Шунингдек, Эмомали Раҳмон ўз нутқида мустақиллик йилларида 1900 мегаватт қувватга эга янги саноат корхоналари қурилгани, 1100 километр узунликдаги электрўтказгич линиялари барпо этилгани, 500 киловолт қувватга эга 4 та подстанция, 220 киловолт қувватли 10 та электростанция ва бошқа объектлар ишга туширилиб, Тожикистоннинг ягона энергетик тизими шаклланганлигини қайд этган.
Унинг сўзларига кўра, соҳани ривожлантириш учун мустақиллик йилларида умумий қиймати 23 миллиард сомонийни ташкил этувчи 25 та лойиҳа амалга оширилган. Айни вақтда мамлакат ҳукумати кўмаги билан жами 6 миллиард сомоний сарфланган 9 та лойиҳа амалга оширилмоқда.
Тожикистон президенти Роғун ГЭСининг барпо этилишига қурилиш бошланганидан бери давлат бюджети ҳисобидан 24 миллиард сомоний сарфланганини маълум қилди.
Шунингдек, у мамлакатда янги энергетика объектларини қуриш ва фойдаланишга топшириш билан бир қаторда ишлаб турганларини қайта тиклаш ва таъмирлаш ишлари ҳам амалга оширилаётганини билдирди.
«Ушбу чора-тадбирлар ички корхоналар фаолиятини йўлга қўйган ҳолда миллий иқтисодиётни ва мамлакат аҳолисини электр билан таъминлаш имконини беради. Ишлаб чиқариш секторини электрсиз ривожлантириб бўлмайди», — дея таъкидлаган Эмомали Раҳмон.
Раҳмон келажакда электр энергиядан самарали фойдаланиш ҳамда ушбу жараёнга замонавий технологияларни жалб қилиш бирламчи аҳамиятга эга эканлигини билдирди.
Изоҳ (0)